Almaniyanın nüvə enerjisindən imtina etməsi Avropanı Rusiya qazından asılı vəziyyətə salır.

Axar.az xəbər verir ki, bu barədə “Teleqraf” qəzetinin köşə yazarı Reyçel Millard yazıb.

O xatırladıb ki, Berlin ölkədə mövcud olan altı atom elektrik stansiyasından üçünü bağlayıb. Qalanları ilin sonuna kimi istismardan çıxarılacaq. Atom elektrik stansiyalarının məhv edilməsi planı 2000-ci illərin əvvəllərində kansler Herhard Şröderin dövründə qəbul edilib. 2011-ci ildə Yaponiyanın Fukusima stansiyasında baş vermiş qəzadan sonra Angela Merkel hökuməti nüvəsiz Almaniyanın qurulması istiqamətində siyasi kursu təsdiqləyib.

“Qlobal istiləşmənin təsirlərini azaltmaq üçün Avropa 2045-ci ilə qədər iqtisadiyyatını təmiz enerjiyə çevirməyi hədəfləyir. Bu o deməkdir ki, qitə fabrikləri, elektromobilləri gücləndirmək və əhalinin tələbatını ödəmək üçün böyük həcmdə aşağı karbonlu elektrik enerjisi istehsal etməli olacaq. Lakin reallıqda Almaniyada atom elektrik stansiyalarının istismardan çıxarılması qitənin kömür və Rusiya qazından asılılığını artıran təhlükəli yoldur”, - deyə Millard qeyd edib.