2026-cı ilin sonu və 2027-ci ilin əvvəlində dünya bazarında bananın qiymətinin artacağı gözlənilir.

"Bloomberg" xəbər verir ki, bunu "Chiquita Brands International" şirkətinin baş direktoru Karlos Lopes Flores bildirib.

"Biz proqnozlaşdırırıq ki, 2026-cı ilin sonu və gələn ilin əvvəli bu sahə üçün çox çətin olacaq", - deyə Flores qeyd edib.

Onun sözlərinə görə, Latın Amerikasında banan istehsalçıları eyni vaxtda həm ekstremal hava şəraiti, həm də geosiyasi qeyri-sabitliklə üzləşirlər.

Yaxın Şərqdəki münaqişənin nəticələri də artıq sahəyə əlavə təzyiq göstərir. Yanacağın, gübrələrin və qablaşdırma materiallarının qiymətləri artır. Bununla yanaşı, təchizatçılar artan xərcləri məhsulun qiymətinə əlavə etməklə kompensasiya etməkdə çətinlik çəkirlər.

Digər risk isə "El-Ninyo" iqlim hadisəsinin güclənməsi ilə bağlıdır. Bu hadisə Ekvador və Peruda leysan yağışlarına səbəb ola, bitki xəstəlikləri, məhsul itkisi və yolların zədələnməsi riskini artıra bilər.

Eyni zamanda, Amazon hövzəsində və Braziliyanın şimal-şərqində quraqlıq Panama kanalında suyun səviyyəsinin aşağı düşməsinə və gəmiçiliyin çətinləşməsinə səbəb ola bilər.