Abşeron rayonunun Masazır qəsəbəsində şəhərsalma normativlərinə və təhlükəsizlik qaydalarına əməl olunmadan fərdi yaşayış evlərinin inşa edildiyi iddia olunur.

Bu barədə məlumat ərazidə yaşayan sakinlər tərəfindən Patrul.az-ın qaynar xəttinə daxil olub.

Bildirilib ki, qəsəbənin Aşıq Alı küçəsində yerləşən 8 sotluq boş torpaq sahəsində eyni anda 8 fərdi yaşayış evinin inşasına başlanılıb.

Lakin sakinlər iddia edirlər ki, tikinti işləri mövcud şəhərsalma normalarına, təhlükəsizlik qaydalarına və inşaat standartlarına uyğun aparılmır.

Şikayətdə qeyd olunur ki, inşa edilən fərdi evlərin müvafiq təməl və bünövrə sistemi yoxdur.

Eyni zamanda, evlər Azərbaycan Respublikasının Şəhərsalma və Tikinti Məcəlləsinin tələbləri pozularaq, aralarında zəruri ara məsafəsi saxlanılmadan və qonşu həyətlərin hasarlarına bitişik şəkildə ucaldılır.

Bundan başqa, müraciətdə ərazidə suaxıdıcı şəbəkənin və texniki infrastrukturun qurulmamasının yaradacağı təhlükələr də xüsusi vurğulanıb:

“Evlərin dam örtüyündən axacaq yağış və qar sularının yönləndirilməsi üçün heç bir drenaj və ya texniki şərait nəzərdə tutulmayıb. Nəticədə, bu sular birbaşa bizim evlərin və hasarların dibinə axaraq zamanla bünövrələri yuyacaq, nəmişlik yaradacaq və hər an uçqun təhlükəsi – real fövqəladə hal – yaradacaqdır”, – deyə sakinlərdən biri bildirib.

Vətəndaşlar sözügedən tikintilərin kommersiya (satış) məqsədilə aparıldığını və bu səbəbdən keyfiyyət standartlarının nəzərə alınmadığını vurğulayırlar.

Aşıq Alı küçəsinin sakinləri aidiyyəti dövlət qurumlarını məsələyə dərhal müdaxilə etməyə və qanunsuz olduğu iddia edilən tikinti işlərinin dayandırılmasını təmin etməyə çağırırlar.