ABŞ dövlət katibi Marko Rubionun Qərb sivilizasiyasının üzləşdiyi təhlükələr barədə çıxışı İranda sərt tənqidlərə səbəb olub. Tehran Vaşinqtonu qədim tarixi hadisələrdən istifadə edərək İrana qarşı müharibəyə haqq qazandırmağa çalışmaqda ittiham edib.
Bizimyol.info xəbər verir ki, “Əl-Cəzirə”nin məlumatına görə, Afina şəhərində, Akropolun fonunda çıxış edən Rubio ABŞ-ı qədim Yunanıstandan Roma imperiyasına qədər uzanan Qərb sivilizasiyasının varisi kimi təqdim edib.

O, müasir Qərb ölkələrinin özünəinamını itirdiyini, sənaye və hərbi imkanlarının zəiflədiyini bildirərək, onların yenidən güclənməli olduğunu vurğulayıb. Rubio eramızdan əvvəl 480-ci ildə farsların Afinanı dağıtmasını xatırladaraq, Qərb sivilizasiyasının xarici düşmənlər qarşısında sağ qalmasını nümunə göstərib.

ABŞ dövlət katibi İranın hazırkı rəhbərliyini də tənqid edərək, onu “fanatiklər” adlandırıb və şəhidlik anlayışından siyasi məqsədlər üçün istifadə etməkdə ittiham edib. Rubio bildirib ki, bu gün Qərbin üzləşdiyi təhlükələr qədim dövrlərdəki təhdidlərdən heç də az deyil.

İranın təhlükəsizlik rəsmisi Möhsün Rzayi və parlamentin sədri Məhəmməd Bağır Qalibaf Rubionun fikirlərinə cavab olaraq, eramızın 260-cı ilində farslar tərəfindən əsir götürülmüş Roma imperatoru Valerianı xatırladıblar.

İran Xarici İşlər Nazirliyinin sözçüsü İsmayıl Bəqayi isə Rubionun yanaşmasını tarixi hadisələrin müasir siyasi məqsədlərə uyğun şəkildə təqdim edilməsi kimi qiymətləndirib. Onun sözlərinə görə, Vaşinqton İrana qarşı güc tətbiqinə haqq qazandırmaq üçün tarixdən istifadə edir.

Rubionun ritorikası Vaşinqtonun İran xalqı ilə İran İslam Respublikası arasında fərq qoymadığı təəssüratını yaradır. Bu isə ABŞ-ın müharibəsinin məqsədlərinə dair iranlılar arasında şübhə və bədbinliyi artırır.