Jurnalistlərə verdiyi açıqlamada Zelenski iddia edir ki, Tramp hazırda Mayamidə Amerika rəsmiləri ilə görüşən ukraynalı danışıqçılardan "tüstü pərdəsi" kimi istifadə edir və bu hərəkəti ilə o, vicdansızlıq yolunu tutub: "Məhz bu anda - komandamız Floridada Amerika komandası ilə danışıqlar apararkən, ABŞ prezidenti bu müharibənin və bu təcavüzün arxasında duran Kreml lideri ilə danışır və Rusiyanın dizel ixrac etməsinə icazə verən razılığa gəlir.

Şübhəsiz ki, bu, Putini yalnız cəsarətləndirir və onlara mübarizəni davam etdirməyə imkan verir. Bu, hazırda, sülhü müzakirə etdiyimiz bir vaxtda baş verir: Amerika Rusiyanın dizel ixracına icazə verir. Bu, milyonlarla, milyardlarla dollar deməkdir. Nəticədə, hər şey insanlara, Ukraynaya qarşı - hamımıza qarşı müharibəyə doğru gedir. Hesab edirəm ki, komandamız sadəcə olaraq tüstü pərdəsi kimi istifadə olunur. Bu, əlbəttə ki, vicdansızlıqdır; tərəfdaşların atmalı olduğu addım, əlbəttə ki, bu deyil. Və mənim fikrimcə, bu, zəif bir qərardır - təəssüf ki, güclü tərəfdaşlar tərəfindən verilən zəif bir qərardır".
Qeyd edək ki, Zelenskini qəzəbləndirən hadisə Trampın cümə günü Putinlə telefon danışığı olub.
Məlumata görə, ABŞ lideri cümə günü günortadan sonra Rusiya prezidenti Vladimir Putinlə telefon danışığından sonra iki ölkənin Rusiyanın ABŞ və qlobal bazarlara dərhal 300.000 tondan çox, noyabr ayında daha 500.000 ton və bundan dərhal sonra 1.000.000 ton dizel yanacağı tədarük edəcəyi barədə razılığa gəldiyini açıqlamışdı.
Tramp əlavə etmişdi ki, Rusiya da tezliklə daha 3.000.000 ton dizel yanacağı tədarük edəcək.
Heydər Oğuz
TEREF