Avropa fond bazarları bazar ertəsi bank sektorunun səhmlərinin bahalaşması fonunda yüksəlib. İnvestorlar bazarın gələcək istiqamətinə təsir göstərə biləcək yeni amilləri qiymətləndirmək üçün şirkətlərin maliyyə hesabatları mövsümünün başlanmasını gözləyirlər.

Ümumavropa “STOXX 600” indeksi 0,56% artaraq 635,09 bəndə çatıb.

Bank sektorunun üstünlük təşkil etdiyi İspaniyanın “IBEX” indeksi 1,1% yüksələrək Avropanın əsas regional indeksləri arasında ən yüksək artımı göstərib. “STOXX 600” bank sektoru indeksi isə 1,5% bahalaşıb.

ABŞ Prezidenti Donald Trampın Ukrayna və Rusiyanın bir-birinin enerji obyektlərinə hücumları dayandırmaq barədə razılığa gəldiyini açıqlamasından sonra neft ucuzlaşıb. Bu açıqlama ABŞ və Rusiya arasında dizel yanacağının tədarükünə dair razılaşma əldə olunmasından sonra səsləndirilib. Bazarlarda Rusiya neftinin tədarükünün artacağına dair gözləntilər güclənib.

İnvestorlar geosiyasi qeyri-müəyyənlik və yüksək borclanma xərcləri şəraitində Avropa şirkətlərinin maliyyə vəziyyətini qiymətləndirmək üçün onların rüblük hesabatlarını diqqətlə izləyəcəklər.

“Trade Nation” şirkətinin baş bazar analitiki Devid Morrison bildirib ki, üçüncü rübün maliyyə nəticələri, xüsusilə yarımkeçirici istehsalçılarının və süni intellekt texnologiyalarının inkişafından faydalanan digər şirkətlərin göstəriciləri yaxın perspektivdə bazar əhvali-ruhiyyəsinin formalaşmasında mühüm rol oynayacaq.

“LVMH” şirkətinin Avropa birjalarında ticarət sessiyası başa çatdıqdan sonra maliyyə nəticələrini açıqlayacağı gözlənilir. Şirkətin səhmləri cüzi bahalaşıb, lüks məhsullar sektorunun ümumi indeksində də zəif artım qeydə alınıb.

Yarımkeçirici avadanlıq istehsalçısı “ASML” və investisiya şirkəti “EQT” isə maliyyə hesabatlarını bu həftənin sonrakı günlərində təqdim edəcəklər.

Bazar ertəsi avrozonada istiqrazların gəlirliliyinin azalması investorların daha riskli aktivlərə marağını artırıb. Bununla belə, istiqrazların gəlirliliyi son illərin ən yüksək səviyyələrinə yaxın qalır. Bu isə faiz dərəcələrinin uzun müddət yüksək saxlanılacağı ilə bağlı narahatlıqları əks etdirir.

“LSEG” tərəfindən toplanmış məlumatlara əsasən, treyderlər Avropa Mərkəzi Bankının (AMB) oktyabr iclasında faiz dərəcələrini dəyişməyəcəyini, dekabrda isə 0,25% bəndi artıracağını gözləyirlər. Analitiklər avrozonada zəif iqtisadi artım fonunda AMB-nin pul-kredit siyasətini daha da sərtləşdirmək imkanlarının məhdud olduğunu bildirirlər.

“Avrozona güclü iqtisadi artımla öyünə bilməz. Hazırkı vəziyyət bunu göstərmir”, - deyə Devid Morrison əlavə edib.

Avtomobil istehsalçılarının səhmləri 0,8% bahalaşıb. Beləliklə, sektor cümə günü başlayan yüksəlişini davam etdirməyə yaxınlaşıb. Buna Çinin hibrid və elektrik şəbəkəsindən enerji ilə doldurulan hibrid avtomobillərin Avropa İttifaqına ixracını azaltmağa razılıq verməsi təsir göstərib.

Media sektorunun səhmləri isə 0,6% ucuzlaşaraq günün ən zəif nəticəsini göstərib. Ayrı-ayrı şirkətlərin səhmlərinə gəlincə, quruda quraşdırılan külək turbinlərinin istehsalçısı “Nordex”in səhmləri 2,5% bahalaşıb. Şirkət üçüncü rübdə layihələr üzrə yeni sifarişlərin həcminin ötən ilin eyni dövrü ilə müqayisədə 30% artdığını açıqlayıb.

Fransanın polad boru istehsalçısı “Vallourec”in səhmləri isə 4% yüksəlib. Buna şirkətin Azərbaycandakı Abşeron qaz yatağı üzrə “TotalEnergies” şirkətindən müqavilə əldə etməsi səbəb olub.

Telekommunikasiya qüllələri operatoru “Inwit”in səhmləri də 3,4% bahalaşıb.