Dərin kosmosun qaranlığından gələn və astronomların “Fast Radio Bursts” (Sürətli Radio Partlayışları – FRB) adlandırdığı sirli radiosiqnallar son illərdə elmi dünyanı hərəkətə gətirən Ən böyük müəmmalardan biridir. Cəmi millisaniyələr davam etməsinə baxmayaraq, Günəşin bir gündə ixrac etdiyi enerjini qısa bir anda yayan bu güclü siqnalların mənbəyi hələ də tam olaraq çözülməyib.

Bu siqnalları xüsusi və diqqətçəkən edən əsas amillərdən biri onların bəzilərinin təkrarolunan təbiətə malik olmasıdır. İlk vaxtlar təsadüfi kosmik hadisələr kimi qiymətləndirilən bu dalğaların müəyyən fasilələrlə yenidən təkrarlanması alimləri maqnetarların (həddindən artıq güclü maqnit sahəsinə malik neytron ulduzlarının) fəaliyyəti və ya digər kosmik kataklizmlər barədə yeni fərziyyələr irəli sürməyə vadar edib.

Elmi təhlillər və araşdırmalar yalnız fiziki hadisələrlə məhdudlaşmır. Bu cür müəmmalı siqnallar bəşəriyyətin ən qədim suallarından biri olan “Kainatda təkikmi?” sualına cavab axtarışlarını da gücləndirir. Bəzi nəzəriyyələrdə bu siqnalların inkişaf etmiş yadplanetli sivilizasiyaların texnoloji fəaliyyətinin izləri ola biləcəyi ehtimalı müzakirə edilir. hərçənd ki, əksər astrofiziklər bunların təbii mənbələrdən qaynaqlandığını düşünürlər.

Elm bu sirri çözmək üçün dünyanın müxtəlif nöqtələrində yerləşən nəhəng radioteleskoplardan və süni intellekt alqoritmlərindən istifadə edir. Kosmosdan gələn bu qədim səslərin izi ilə gedən tədqiqatçılar kainatın strukturunu daha dərindən anlamaq və milyardlarla işıq ili uzaqlıqdan gələn mesajların sirrini açmaq üçün səylərini davam etdirirlər.
Faktum.az