Kapital Bank bu il əhalini 400 milyon manatdan çox borclandırıb
Bu gün, 08:34
“Kapital Bank” ASC 2026-cı ilin ilk doqquz ayında istehlak krediti portfelini mütləq məbləğ ifadəsində ən çox artıran bank olub.
Tribuna.az xəbər verir ki, bankların maliyyə göstəricilərinin təhlilinə əsasən, sentyabrın 30-na Kapital Bankın istehlak krediti portfeli 3 milyard 536,9 milyon manat təşkil edib.
Bu göstərici ilin əvvəli ilə müqayisədə 12,8% və ya təxminən 401 milyon manat çoxdur.
Belə ki, 2025-ci ilin sonunda bankın istehlak krediti portfeli təxminən 3 milyard 136 milyon manat olub.
Kapital Bank mütləq artım üzrə ABB-ni geridə qoyub.
2026-cı ilin üçüncü rübünün sonuna təqdim olunan 21 bankın ümumi istehlak krediti portfeli 10 milyard 408,1 milyon manat təşkil edib. Bu məbləğin 34%-i Kapital Bankın payına düşüb.
Başqa sözlə, siyahıdakı bankların əhaliyə verdiyi hər 100 manat istehlak kreditinin təxminən 34 manatı Kapital Bankın portfelində cəmləşib.
Kapital Bankın istehlak krediti portfeli ikinci yerdəki ABB-nin göstəricisindən təxminən 1 milyard 293 milyon manat çoxdur.
Beləliklə, Kapital Bank 2026-cı ilin ilk doqquz ayında həm istehlak krediti portfelinin ümumi həcminə, həm də mütləq artımına görə təqdim olunan banklar arasında liderliyini qoruyub.
