Almaniyada Xristian Demokrat İttifaqının (CDU) qadın təşkilatı olan Qadınlar Birliyi (Frauen Union) uşaq bağçalarında və məktəblərdə 14 yaşına çatmamış qızların hicab taxmasına icazə verilib-verilməməsi məsələsinin araşdırılmasını tələb edir.
Təşkilat oktyabrın 10-da yaydığı bəyanatda uşaqların dini və sosial təzyiqlər olmadan böyüməli olduqlarını vurğulayıb.
Təşkilatın fikrincə, erkən yaşlarda hicab taxılması digər müsəlman qızlara da təzyiq göstərə bilər. Həmçinin bəzi şagirdlərin məktəb ekskursiyalarında, idman məşğələlərində və üzgüçülük dərslərində iştirakdan kənarda qala biləcəyi qeyd olunub.
Almaniyada 14 yaş həddinin müəyyənləşdirilməsi ilə bağlı müzakirələr nəticəsində diqqət mərkəzinə düşən Frauen Union, 14 yaşına çatmamış qızlara hicab taxılmasının qadağan edilməsinin hüquqi baxımdan mümkün olub-olmadığının araşdırılmasını tələb edib.
Hələlik hər hansı qadağa tətbiq edilməyib! Hazırda söhbət siyasi tələb irəli sürülməsindən və məsələnin hüquqi baxımdan araşdırılmasına çağırışdan gedir.
Hicabla bağlı müzakirələr uşaqların hüquqları, dini azadlıq və valideynlərin qərarvermə məsuliyyəti məsələlərini yenidən gündəmə gətirib.
Mənbə: CDU-nun Frauen Union qadın təşkilatının 10 oktyabr 2026-cı il tarixli rəsmi bəyanatı / Euronews.