Ukrayna Prezidenti Volodimir Zelenski jurnalist Pirs Morqana verdiyi müsahibədə ABŞ Prezidenti Donald Trampın Ukrayna rəhbərliyinin dəyişməsi zərurəti ilə bağlı sözlərindən sonra istefa vermək niyyətində olmadığını bildirib.

Bu barədə "UNIAN" agentliyi məlumat yayıb. Zelenski istefa verib-verməyəcəyi ilə bağlı suala qısaca "Əlbəttə, xeyr" cavabını verib.

Həmin müsahibədə Ukrayna dövlət başçısı Rusiya ilə dizel müqaviləsindən sonra özünü Tramp tərəfindən xəyanətə uğramış hiss etdiyini də etiraf edib; o, amerikan liderinin Ukraynanın tərəfini seçməməsini "ağrılı" adlandıraraq ABŞ-ın münaqişə tərəflərinə münasibətdə neytral mövqe saxlamalı olduğunu vurğulayıb.
Xatırladaq ki, oktyabrın 10-da Donald Tramp Ukrayna prezidentinin dəyişdirilməsinə çağırış edərək ölkəyə Rusiya ilə sülh əldə etməyə qadir yeni rəhbərin lazım olduğunu və Zelenskinin bir çox razılaşmalar bağlaya biləcəyi halda bunu etmədiyini bildirmişdi. Bundan bir gün əvvəl, oktyabrın 9-da Rusiya və ABŞ prezidentləri Vladimir Putin ilə Donald Tramp arasında telefon danışığı baş tutmuş, Tramp bu söhbəti uğurlu qiymətləndirərək Rusiyanın yaxın vaxtlarda beynəlxalq bazarlara, o cümlədən ABŞ-a iri həcmdə dizel və yanacaq tədarük edəcəyini elan etmişdi. ABŞ Maliyyə Nazirliyi isə Rusiya dizelinə tətbiq olunan sanksiyaların altı ay müddətinə – 2027-ci il aprelin 7-dək ləğv edildiyini açıqlayıb.