ABŞ prezidenti Donald Tramp Rusiya, Belarus, Kuba və Şimali Koreyadan olan mallara əlavə ticarət rüsumları tətbiq etməyib, çünki bu ölkələr artıq ABŞ-nin sanksiyaları altındadır.

Teleqraf xəbər verir ki, bu barədə Ağ Evin mətbuat katibi Karolin Livitt bildirib.

O bildirib ki, bu ölkələrə qarşı tətbiq olunan mövcud sanksiyalar kifayət qədər sərtdir və əlavə ticarət məhdudiyyətləri tətbiq etmək planlaşdırılmır.

“Amma Rusiya gələcəkdə daha sərt sanksiyalarla üzləşə bilər”, - o qeyd edib.

Ağ Evin mətbuat katibinin sözlərinə görə, Kanada və Meksikaya yeni ticarət məhdudiyyətləri qoyulmayıb, çünki ABŞ daha əvvəl bu ölkələrə 25 faizlik rüsum tətbiq edib.

Xatırladaq ki, aprelin 2-də Tramp ABŞ-nin idxal olunan mallara 10% minimum gömrük rüsumu tətbiq edəcəyini açıqlayıb. Həmçinin bəzi ölkələr üçün xüsusi tariflər müəyyən edilib. Bu gündən isə ABŞ bütün idxal olunan avtomobillərə 25% gömrük rüsumu tətbiq etməyə başlayacaq.