Balaxanı qəsəbəsində yerləşən “Neftçi Kafe”dən alınan xaşın vəziyyəti müştərinin narazılığına səbəb olub. İddialara görə, sifariş edilən xaşın içərisində çoxlu sayda tük olub.

“Real Azərbaycan” xəbər verir ki, Tamerlan Babayev bu barədə “Facebook” sosial şəbəkəsindəki “Müştəriyəm Şikayətim Var” qrupunda paylaşım edib.

Onun sözlərinə görə, məsələ ilə bağlı kafe ilə əlaqə saxladıqda müəssisə əvvəlcə xaşın onlara aid olmadığını və özlərində belə halın baş vermədiyini bildirib. Daha sonra isə yeməyin kuryer tərəfindən çatdırılarkən dəyişdirilə biləcəyi iddia olunub.

Tamerlan Babayev qeyd edib ki, müxtəlif bəhanələr səsləndirilsə də, müştəridən üzr istəmək əvəzinə sonradan “Wolt” şirkətinin adından ona zənglər edilib.

Müştərinin narazılığına səbəb olan əsas məqam isə iddiaya görə, yeməyin keyfiyyəti ilə bağlı yaranmış problemin aydınlaşdırılması əvəzinə məsuliyyətin bir tərəfdən digərinə yönəldilməsidir.

“Sadəcə biyabırçılıq!” – deyə Tamerlan Babayev paylaşımında bildirib.