Ukrayna Prezidenti Volodimir Zelenski ABŞ Prezidenti Donald Trampın nümayəndələri Stiv Uitkoff və Cared Kuşnerlə danışıqlar aparıb.
APA xəbər verir ki, bu barədə Zelenski “Telegram” kanalında məlumat yayıb.

Bildirilib ki, tərəflər Floridada Ukrayna və ABŞ nümayəndə heyətləri arasında keçirilən görüşün nəticələrini və diplomatik prosesin növbəti mərhələlərini müzakirə ediblər.

“Komandalarımız faktiki olaraq daim əlaqə saxlayır. Biz diplomatik sahədə növbəti addımları da hazırlayırıq. Tərəfdaşlarımızı Rusiyanın bir an belə dayanmayan hücumları və hava hücumundan müdafiə məsələləri ilə bağlı real vəziyyət barədə mütəmadi məlumatlandırırıq”, – Zelenski bildirib.

Ukrayna Prezidenti vurğulayıb ki, sülh prosesində ABŞ-ın mövqeyindən çox şey asılıdır.

Onun sözlərinə görə, Ukrayna konkret nəticə əldə etmək üçün konstruktiv və səmimi əməkdaşlığı davam etdirməyə hazırdır.

“Sülh yalnız güc və qarşılıqlı etimada əsaslanan əməkdaşlıq sayəsində əldə olunur”, – Zelenski qeyd edib.

O əlavə edib ki, Ukrayna ABŞ-ın mövqeyinin güclü olması və müharibənin başa çatdırılmasına kömək etməsi üçün mümkün olan bütün addımları atır.