Məlum olduğu kimi, Prezident İlham Əliyevin iyunun 22-də imzaladığı Sərəncamla Nurlana Əliyeva Bakı Slavyan Universitetinin rektoru vəzifəsindən azad edildi. N.Əliyevanın 2016-cı ilin iyunun 23-də BSU-ya rektor təyin olunmuşdu. Ancaq bu müddət ərzində onun fəaliyyətindən Universitetdə müəyyən narazılıq yaranmışdı.

Prezidentin məlum sərəncamından sonra Təhsil Nazirliyinin Elm, ali və orta ixtisas şöbəsinin müdir müavini Anar Nağıyev Bakı Slavyan Universitetinə rektor əvəzi təyin olunub. Anar Nağıyev 3 ay müddətində BSU-da rektor vəzifəsini icra edəcək.

Bu arada Azinforum.az-ın əldə etdiyi məlumata görə, BSU-da yeni rektor əvəzi A.Nağıyevin fəaliyyətindən narazılıq yaranıb. Narazılığa səbəb odur ki, bu günə qədər müəllimlərin iyun ayı üzrə məvacibləri verilməyib. Üstəlik iyulun 7-dən müəllimlər məzuniyyətə çıxsalar da, məzuniyyət pulunu ala bilməyiblər. Bu da müəllimlərin ciddi narazılığına səbəb olur. Hansı ki, N.Əliyevanın rektor olduğu vaxt məvaciblər hər ayın 29-na qədər ödənilirdi.