Son araşdırma göstərib ki, sonuncu buzlaşma dövrünün ən sərt mərhələlərində insanlar Mərkəzi Balkanlarda, indiki Serbiya ərazisindəki mağaralarda yaşamağa davam ediblər. Alimlərin fikrincə, bu ərazilər insanların sərt iqlim şəraitindən qorunduğu və ətraf ərazilərdən istifadə etdiyi mühüm məkanlardan biri olub.
Bu barədə tədqiqat “Quaternary” elmi jurnalında dərc olunub.

Araşdırmaya görə, insanlar təxminən 25-19 min il əvvəl, sonuncu buzlaşmanın ən soyuq mərhələlərindən birində Mərkəzi Balkanlarda, xüsusilə Serbiyada mövcud olublar.

Tədqiqatçılar Serbiyanın üç mağara ərazisində aparılan qazıntıların nəticələrini və daha iki ərazidən əldə olunan tarixləndirmə məlumatlarını araşdırıblar. Əldə olunan sübutlar həmin dövrdə insanların bölgədə məskunlaşdığını göstərib.

Araşdırmanın müəllifləri bildirirlər ki, Mərkəzi Balkanlardakı bu ərazilərin xronoloji mövqeyi ətraf bölgələrdəki məlumatlarla uyğun gəlir. Bu isə insanların digər ərazilərdə olmadığı dövrdə Balkanların həmin hissəsində yaşaya bilmiş ola biləcəklərini göstərir.

Alimlərin diqqət çəkdiyi məqamlardan biri də mağaralardakı yaşayışın xarakteridir. Tədqiq edilən üç əsas ərazinin qısa müddətli məskunlaşma yerləri olduğu, burada fəaliyyətlərin nisbətən məhdud xarakter daşıdığı müəyyən edilib. Buna görə tədqiqatçılar bu mağaraların həmin dövrdə ovçu-yığıcı insanların bütün yaşayış sistemini tam əks etdirib-etdirmədiyi məsələsinin açıq qaldığını qeyd edirlər.