Türkiyənin Van şəhərində milyonlarla lirəlik qızıl taxıldığı toy görüntüləri ilə gündəmə gələn və daha sonra “cinayətdən əldə edilmiş əmlak dəyərlərinin yuyulması” ittihamı ilə həbs edilən Mehmet Fatih Tançalanla bağlı istintaqda yeni detallar ortaya çıxıb.

Sosial mediada “Vanlı Kara Haydar” kimi tanınan Tançalanın həyat yoldaşı, sosial media fenomeni Çağla Öz Tançalan barəsində saxlanılma qərarı verilib. Lakin onun ünvanında olmadığı müəyyən edilib və hazırda axtarışda olduğu bildirilir.

İstintaq çərçivəsində Çağla Öz Tançalanın anası Nilgün Oya da İstanbulda saxlanılıb. Onun adının Maliyyə Cinayətləri Araşdırma Şurasının (MASAK) hazırladığı maliyyə hesabatında keçdiyi qeyd olunur.

44 milyon lirəlik qızıl məsələsi

Mehmet Fatih Tançalan və Çağla Öz Tançalan Vanda keçirilən toy mərasimindən yayılan görüntülərlə geniş ictimaiyyətin diqqətini çəkmişdi. Görüntülərdə gəlinin üzərinə milyonlarla lirə dəyərində qızıl taxıldığı görünürdü.
Toyda təxminən 44 milyon türk lirəsi dəyərində qızıl taxıldığı iddia edilmişdi. Lakin sonradan qızılların zərgərlik mağazasından reklam məqsədilə icarəyə götürüldüyü məlum olub. Həmçinin cütlüyün həmin mərasimdən aylar əvvəl rəsmi şəkildə evləndiyi bildirilib.
Görüntülərin sosial mediada geniş yayılmasından sonra Van Baş Prokurorluğu Tançalan barəsində “cinayətdən əldə edilmiş əmlak dəyərlərinin yuyulması” ittihamı ilə istintaqa başlayıb.

Tançalan ifadəsində toyda istifadə olunan qızılların bir zərgərdə reklam məqsədilə götürüldüyünü və mərasimdən sonra geri qaytarıldığını deyib.

Hesablarda 115 milyon lirəlik pul dövriyyəsi

İstintaq materiallarında MASAK tərəfindən aparılan maliyyə araşdırmasının nəticələri də yer alıb. Hesabata əsasən, Tançalana məxsus hesablarda 115 milyon türk lirəsinə çatan pul dövriyyəsi müəyyən edilib.

Prokurorluq həmçinin Tançalanın sosial mediada nümayiş etdirdiyi həyat tərzi ilə rəsmi gəlirləri arasında uyğunsuzluq olduğunu vurğulayıb.

Onun tez-tez xarici ölkələrə səfər etməsi də nəzərə alınaraq, qaçma ehtimalının mövcud olduğu bildirilib.
İstintaq çərçivəsində Tançalan həbs edilib. Onun həyat yoldaşı Çağla Öz Tançalan isə hazırda axtarılır. Anası Nilgün Oyanın saxlanılması ilə birlikdə iş üzrə araşdırmaların genişləndirildiyi bildirilir.