Meksikanın paytaxtı Mexiko şəhəri ciddi təhlükə ilə üz-üzədir. Yeraltı suların intensiv şəkildə istismarı nəticəsində meqapolis ildə 42 santimetrə qədər yerin altına batır. Bu geoloji proses şəhər üçün geri dönüşü olmayan bir fəlakətə çevrilir.

Aparılan tədqiqatlar göstərir ki, qurumuş göl yatağında salınan şəhərin altındakı su təbəqələri tamamilə boşalıb. Nəticədə, təzyiq altında qalan torpaq qatları sıxılır və çökmə prosesi sürətlənir. Küçələrdə yaranan nəhəng çatlar, dağılmaq təhlükəsi ilə üzləşən binalar, metro xətləri və infrastruktur sistemləri vəziyyətin nə qədər kritik olduğunu sübut edir.

Mütəxəssislərin fikrincə, torpağın məsamə quruluşunu itirməsi bu çökməni fiziki cəhətdən dönməz edir. Üstəlik, sıxılan torpaq təbəqələrinin su saxlama qabiliyyətini itirməsi gələcəkdə şəhəri daha ağır su böhranı ilə qarşı-qarşıya qoyacaq. Müasir radar məlumatları çökmənin aylıq 2 santimetrdən çox sürətlə davam etdiyini təsdiqləyir.

Qeyd edək ki, təxminən 22 milyon əhalisi olan bu nəhəng meqapolis, dünyanın ən çox insan yaşayan şəhərlərindən biridir və hazırda ciddi təbii təhlükə altındadır.

Mənbə: milletinsesi.info