Almaniya son iki onillikdə pensiya sisteminin ən genişmiqyaslı islahatı ərəfəsindədir.

Bu barədə "Financial Times" nəşri məlumat yayıb. Bildirilib ki, bu dəyişiklik ənənəvi sığorta şirkətləri üçün ciddi böhran təhlükəsi yaradır.

Məlumata görə, yanvar ayından etibarən ölkədə yeni qaydalar tətbiq olunmağa başlayacaq. Əsas yenilik komissiya haqlarının əvvəlki 4% əvəzinə 1%-ə qədər azaldılmasıdır. Nəticədə, yüz milyardlarla avroluq vəsait axını sığortaçılardan qlobal aktiv idarəedicilərinə və provayderlərə doğru yönələcək. "Morgan Stanley" mütəxəssislərinin hesablamalarına əsasən, bu addım kapital bazarlarına hər il 40 milyard avro həcmində əlavə vəsait cəlb edəcək.

İslahatın əsas məqsədi vəsaitlərin qaytarılmasına dair sərt zəmanətlərdən və məcburi ömürlük annuitetlərdən imtina etməklə pensiyaların gəlirliliyini artırmaqdır. Bunun əvəzində vətəndaşlara vəsaitlərini çıxarmaq üçün daha çevik planlar təklif ediləcək.

Lakin sığorta sektoru bu vəziyyətdən ciddi şəkildə narahatdır. Ömürlük zəmanətlərin ləğv edilməsi pensiyaçıları bazar dəyişkənliyi dövründə müxtəlif risklərlə üz-üzə qoyur. Bundan əlavə, idarəetmənin mürəkkəbliyi səbəbindən ekspertlər infrastrukturun yanvar ayında yeni sistemin işə salınmasına texniki cəhətdən hazır olduğuna şübhə ilə yanaşırlar. Yeni pensiya hesabları uğrunda rəqabətə rəqəmsal brokerlər və fintex şirkətləri də fəal şəkildə qoşulublar.