İranın nüvə obyektlərinə atom bombası atılacağı barədə yayılan iddialar Azərbaycanda da ciddi narahatlıq yaradır. Paytaxt Bakı, Naxçıvan, Astara və digər sərhəd bölgələrimiz üçün real təhlükə nədir? Əhali hansı ehtiyatları toplamalıdır?

İran ətrafında hərbi gərginlik getdikcə daha təhlükəli xarakter alır. ABŞ-nin İrana nüvə zərbəsi endirə biləcəyi barədə yayılan məlumatlar qonşu Azərbaycanda da insanları tədirgin edir. Xüsusilə İsfahan və Natans nüvə obyektlərinin mümkün hədəflər sırasında göstərilməsi ölkəmizin təhlükəsizliyi ilə bağlı ciddi suallar doğurur.

Amerikalı jurnalist Taker Karlson İsrailin Baş naziri Benyamin Netanyahunun təzyiqi ilə Donald Trampın İrana qarşı nüvə silahından istifadə edə biləcəyini iddia edib. Noyabrın 7-si mümkün tarix kimi səsləndirilib.
İranın Natanz, Fordo və İsfahan nüvə kompleksləri uzun müddətdir hərbi-siyasi müzakirələrin mərkəzindədir.

İsfahan vurularsa, Bakı təhlükəyə düşərmi?

İsfahandan Bakıya düz xətt üzrə təxminən 877, Astaraya 693, Naxçıvana 921 kilometr məsafə var. Natanzdan Bakıya məsafə isə təxminən 788 kilometrdir.

Bu məsafələrdə nüvə partlayışının birbaşa dağıdıcı zərbə dalğasının Bakıya çatması gözlənilmir. Əsas təhlükə radioaktiv maddələrin atmosfer vasitəsilə yayılmasıdır.

Musavat.com-un araşdırmalarına görə, belə bir faciə baş verərsə bu zaman küləyin istiqaməti, partlayışın gücü, radioaktiv maddələrin havaya qalxma miqdarı və yağıntılar həlledici rol oynayacaq. Radioaktiv buludun Azərbaycan ərazisinə çatması mümkündür, lakin bunun baş verəcəyini indidən qəti söyləmək olmaz.

Xüsusilə Astara, Lənkəran, Biləsuvar, Cəlilabad və Naxçıvanda vəziyyətin diqqətlə izlənilməsi vacibdir.

İran əhaliyə təlimat verir, Avropa 72 saatlıq ehtiyat hazırlayır

İnternetdə İran əhalisinə nüvə partlayışından qorunma qaydalarını izah edən video-təlimatlar yayılıb. Onların İran dövlət televiziyasında nümayiş etdirildiyi də bildirilir.

Digər tərəfdən, Avropa Komissiyası 27 üzv ölkəni əhatə edən fövqəladə hazırlıq strategiyasında əhalinin ən azı 72 saat özünü təmin edə bilməsini tövsiyə edib. Başqa ölkələrdə də oxşar hazırlıq proqramları mövcuddur. Lakin bunlar yalnız nüvə müharibəsi üçün deyil, bütün fövqəladə vəziyyətlər üçün nəzərdə tutulub.

Azərbaycan ailələrinin də üç günlük içməli su, uzunmüddətli saxlanan ərzaq, zəruri dərmanlar, fənər, radio və enerji bankı ehtiyatı saxlaması məqsədəuyğundur. Bu, panika deyil, adi təhlükəsizlik tədbiridir.

Nüvə hadisəsi zamanı əsas tövsiyə möhkəm binaya daxil olmaq, zirzəmidə və ya binanın daxili hissəsində sığınmaq, pəncərələrdən uzaq dayanmaq və rəsmi göstərişləri izləməkdir. Kalium-yodid preparatları isə yalnız səhiyyə qurumlarının göstərişi ilə qəbul edilməlidir.

Azərbaycan iki müharibə coğrafiyasının qonşusudur

Azərbaycanın vəziyyətini həssas edən başqa mühüm amil də var: ölkəmiz həm Rusiya, həm də İranla həmsərhəddir. Hər ikisi Xəzər dövlətidir.

Rusiya–Ukrayna müharibəsinin əsas döyüş meydanları sərhədlərimizdən uzaqda yerləşir. İran ətrafında mümkün böyük müharibə isə bilavasitə cənub qonşuluğumuzda gedə bilər.

Belə qarşıdurmanın Xəzər hövzəsinə yayılması enerji infrastrukturu, gəmiçilik, ticarət və ekoloji təhlükəsizlik üçün əlavə risklər yaradacaq. Nüvə silahından istifadə isə vəziyyəti daha təhlükəli mərhələyə keçirə bilər.

Azərbaycan nə etməlidir?

İnşallah, belə bir fəlakət yaşanmaz. Amma dünyadakı gedişatdan da narahatlıq yağır. Bu baxımdan, bizə görə Fövqəladə Hallar Nazirliyi və digər aidiyyəti qurumlar mümkün radioloji təhlükə zamanı əhalinin necə davranmalı olduğunu əvvəlcədən izah etməlidirlər. Sərhəd rayonlarında radiasiya monitorinqi, içməli suyun mühafizəsi, sığınacaq imkanları və operativ xəbərdarlıq sistemi xüsusi əhəmiyyət daşıyır.

Azərbaycan əhalisinin qorxuya düşməsinə əsas yoxdur. Amma hazırlıqsız qalmaq da doğru deyil.

Dünyanın inkişaf etmiş ölkələri fövqəladə vəziyyətlər üçün ehtiyat planları hazırlayırsa, Azərbaycan da eyni yanaşmanı tətbiq etməlidir.

Nüvə müharibəsinin başlayacağı heç bir qaynaq tərəfindən təsdiqlənməyib. Lakin belə bir təhlükənin müzakirə edildiyi dövrdə Azərbaycan dövləti də, vətəndaşları da bütün ehtimallara hazır olmalıdır. Panika yox, hazırlıq!
Allah Azərbaycanı və ona aid olan bütün nəsnələri qorusun.

Musavat.com