131 investisiya fondunun ləğvi və 455 mindən çox investorun təsirlənməsi fonunda İstanbul birjasındakı böhranla bağlı araşdırma genişləndirilir

Türkiyə Prezidenti Rəcəb Tayyib Ərdoğan ölkənin fond bazarında yaşanan kəskin enişi və investisiya fondları ilə bağlı böhranı araşdırmaq üçün dövlət nəzarət şurasının yaradılacağını açıqlayıb.

Bestmedia.az xəbər verir ki, Ərdoğan bu barədə hakim Ədalət və İnkişaf Partiyasının (AK Parti) üzvləri qarşısında çıxışı zamanı bildirib.

Prezidentin sözlərinə görə, hökumət əvvəlki gün keçirilən Nazirlər Kabinetinin iclasında, eləcə də bu gün baş tutan geniş müşavirədə böhranla bağlı mühüm qərarlar qəbul edib. Problemin həlli üçün atılacaq addımlar müəyyənləşdirilib və fəaliyyət planı hazırlanıb.

Ərdoğan bildirib ki, dövlət nəzarət şurasına Türkiyənin vitse-prezidenti rəhbərlik edəcək.

“Dövlətin və xalqın əmlakına əl uzadanlara qarşı heç bir dözümlülük göstərməyəcəyik” - deyə Türkiyə prezidenti vurğulayıb.

O əlavə edib ki, hər hansı şəxsin siyasi mənsubiyyəti dövlət və ya ictimai əmlakla bağlı pozuntulara münasibətdə güzəşt üçün əsas ola bilməz.

Türkiyə birjasında böhran necə başladı?

Türkiyənin kapital bazarında böhran sentyabr ayında bir sıra investisiya fondlarının investorların vəsaitlərinin geri qaytarılması ilə bağlı öhdəliklərini yerinə yetirməkdə çətinlik çəkməsindən sonra kəskinləşib. Nəticədə İstanbul Birjasının əsas göstəricisi olan BIST 100 indeksində ciddi eniş qeydə alınıb. Sentyabrın ortalarında indeks həftəlik ifadədə 8 faizdən çox geriləyib.

Türkiyə Sermaye Piyasası Kurulu (SPK) sentyabrın 17-də yeddi portfel idarəetmə şirkətinə məxsus 131 investisiya fondunun ləğv edilməsi barədə qərar qəbul edib. Rəsmi məlumatlara görə, həmin fondlarda 455 758 fərdi investorun payı olub.

Ləğv edilən fondların ümumi aktivlərinin həcmi təxminən 18 milyard dollar qiymətləndirilir. Böhran fonunda Türkiyə hökuməti lirənin likvidliyini artırmaq və bəzi kapital və marja tələblərini yumşaltmaqla maliyyə sabitliyini qorumaq üçün əlavə tədbirlər də görüb.

Prokurorluq da araşdırma aparır

İstanbul Prokurorluğu kapital bazarındakı əməliyyatlarla bağlı ayrıca araşdırma həyata keçirir. İstintaq çərçivəsində bir sıra investisiya və portfel idarəetmə şirkətlərinin rəhbərləri və digər şəxslər saxlanılıb və həbs ediliblər.

Reuters-in məlumatına görə, araşdırma Katilimevim, Gündoğdu Gıda və Destek Finans şirkətlərinin səhmləri ilə bağlı şübhəli əməliyyatları da əhatə edir. Saxlanılan şəxslərə kapital bazarı qanunvericiliyinin pozulması, cinayət təşkilatına üzvlük və ağırlaşdırıcı hallarda dələduzluq kimi ittihamlar irəli sürülüb.

Son günlərdə Türkiyə hakimiyyəti araşdırma çərçivəsində bəzi şirkət və şəxslərin aktivlərinə qoyulmuş məhdudiyyətləri də yenidən nəzərdən keçirib. Sentyabrın 28-də 46 şirkət üzrə aktivlərin dondurulması qərarının ləğv edildiyi bildirilib, lakin ümumi istintaq davam edir.

Belə bir şəraitdə Ərdoğanın elan etdiyi dövlət nəzarət şurasının investisiya fondları böhranının səbəblərini və bazarda baş verən əməliyyatları araşdırması gözlənilir.