İraq hökuməti Səudiyyə Ərəbistanına edilən hücumu pisləyir və onunla bağlı dərhal araşdırma aparılmasını əmr edib.

Musavat.com xəbər verir ki, bu mövqe İraq Nazirlər Kabinetinin xüsusi bəyanatında qeyd olunub: "İraq hökuməti Səudiyyə Ərəbistanına edilən hücumu pisləyir və Krallığın təhlükəsizliyini və sabitliyini təhdid edən və ya iki ölkə arasındakı qardaşlıq münasibətlərinə xələl gətirən hər hansı bir təcavüz aktını rədd etdiyini bəyan edir".

Bəyanatda qeyd olunur ki, İraqın Baş naziri Əli əl-Zeydi "hücumun şərtləri ilə bağlı təcili araşdırma aparılmasını və məsul şəxslərin müəyyən edilməsini, eləcə də iştirakı aşkar edilən hər kəsə qarşı hüquqi tədbirlər görülməsini əmr edib": "Dövlət İraqa və ya dost ölkələrlə münasibətlərinə təhlükə yaradan heç bir fəaliyyətə dözməyəcək. Dövlətimiz Səudiyyə Ərəbistanının mövqeyini və İraqın vəziyyəti həll etmək səylərinə konstruktiv reaksiyasını yüksək qiymətləndirir. Bu, Krallığın İraqın təhlükəsizliyini və sabitliyini təmin etmək öhdəliyini nümayiş etdirir".

İraqın Baş naziri, eyni zamanda ölkənin baş komandanı vəzifəsini icra edən Əli əl-Zeydi Səudiyyə Ərəbistanındakı neft obyektinə dron hücumunun mənbəyi olan Meysan əyalətindəki qoşun komandirini vəzifəsindən azad edib.

INA Agentliyinin məlumatına görə, əl-Zeydi Meysan Əməliyyatlar Komandanlığının komandirini Krallığa qarşı son hücumların həmin əyalətdəki bir ərazidən qaynaqlandığını təsdiqlədikdən sonra vəzifəsindən azad edib.