"Google" çərşənbə günü Finlandiyada süni intellekt infrastrukturu üçün ən azı 13 milyard avro (15,1 milyard dollar) sərmayə yatırmaq planlarını açıqlayıb.

Şirkət bunu öz tarixində Avropaya yatırılan ən böyük birdəfəlik sərmayə kimi qiymətləndirib.

Şirkətin məlumatına görə, investisiya 2027 və 2028-ci illərdə Hamina, Kajaani, Muhos və Vaala şəhərlərində məlumat mərkəzlərinin və onları dəstəkləyən infrastrukturun inkişafına yönəldiləcək.

Tikinti mərhələsində sərmayənin Finlandiyanın ümumi daxili məhsuluna hər il orta hesabla 3,6 milyard avro töhfə verəcəyi və 37 mindən çox iş yerini dəstəkləyəcəyi gözlənilir. Obyektlər istifadəyə verildikdən sonra isə hər il 7 min iş yerinin təmin ediləcəyi proqnozlaşdırılır. Bu iş yerlərində orta əməkhaqqının Finlandiya üzrə median göstəricidən 24 faiz yüksək olacağı bildirilir.

"Google" 15 ildən artıqdır Finlandiyada fəaliyyət göstərir. Şirkət 2009-cu ildə Haminada yerləşən keçmiş kağız fabrikini məlumat mərkəzinə çevirib. Yeni investisiya şirkətin ölkədəki mövcud infrastrukturunu genişləndirəcək və "Gemini", "Search", "Maps" və "YouTube" kimi xidmətlərin fəaliyyətinin təmin edilməsinə xidmət edəcək.

Açıqlama çərçivəsində "Google" Finlandiyanın enerji şirkəti "Fortum" ilə Loviisa Atom Elektrik Stansiyasının istismar müddətinin uzadılmasını nəzərdə tutan 22 illik elektrik enerjisinin satın alınması müqaviləsi imzalayıb. Hazırda stansiya Finlandiyanın elektrik enerjisinin təxminən 10 faizini təmin edir və burada təqribən 580 nəfər çalışır.

Şirkətin məlumatına görə, bu müqavilə olmasaydı, stansiyanın 2030-cu ildən sonra fəaliyyətini davam etdirməsi mümkün olmayacaqdı. "CNBC"nin məlumatına əsasən, açıqlamadan sonra "Fortum"un səhmləri 11 faiz bahalaşıb.

"Google", həmçinin "Valorem" və "Suomen Hyötytuuli" ilə quruda yerləşən külək elektrik stansiyalarından enerji alınmasına dair yeni müqavilələr bağladığını açıqlayıb. Bununla şirkətin Finlandiyada müqavilə əsasında şəbəkəyə əlavə edəcəyi yeni quruda külək enerjisi gücü ümumilikdə 629 meqavata çatıb.

Kajaani yaxınlığında yaradılacaq 94 meqavat gücündə batareya enerjisinin saxlanması sisteminin isə 2027-ci ilin sonlarında istismara verilməsi gözlənilir.

Şirkət Finlandiyanın şimalında yeni məlumat mərkəzləri üçün yerlərin müəyyənləşdirilməsi məqsədilə elektrik şəbəkəsi operatoru "Fingrid" və "Business Finland" ilə əməkdaşlıq etdiyini bildirib. Bu ərazilərdə mövcud elektrik şəbəkəsi infrastrukturu karbon emissiyası yaratmayan enerji mənbələrinə yaxın yerləşir.

"Google"un sifarişi ilə aparılan araşdırmaya görə, 1 giqavat həcmində yeni enerji tələbatının Finlandiyanın cənubunda deyil, Oulu-Kajaani bölgəsində yerləşdirilməsi 20 il ərzində ölkə üzrə enerji istehlakçılarına təxminən 520 milyon avro qənaət etməyə imkan verə bilər.

Şirkət məlumat mərkəzlərinin yerləşəcəyi dörd bələdiyyədə icma proqramlarına dörd il ərzində 31 milyon avro ayırmağı da öhdəsinə götürüb. Bu məbləğin 10 milyon avrosu tədqiqat və innovasiya layihələrinə yönəldiləcək.

İşçi qüvvəsinin hazırlanması təşəbbüsləri çərçivəsində "Google.org"un "AI Opportunity Fund" proqramı vasitəsilə 4 400-dən çox işçiyə süni intellekt bacarıqlarının öyrədilməsi nəzərdə tutulur. Bundan başqa, 100-dək finlandiyalı tələbənin məlumat mərkəzlərində işləmək üçün hazırlanması planlaşdırılır.

Finlandiyanın Baş naziri Petteri Orpo bildirib ki, "Google"un investisiyası ölkənin üstünlüklərinin aydın göstəricisidir.

"Məlumat iqtisadiyyatının yaratdığı dəyər birbaşa investisiyalardan xeyli kənara çıxaraq innovasiya, tədqiqat və inkişafı təşviq edir", — deyə baş nazir vurğulayıb.

"Alphabet" və "Google"un prezidenti və investisiyalar üzrə baş direktoru Rut Porat isə bildirib ki, sərmayə "Google"un ölkədəki fəaliyyətini məsuliyyətli şəkildə genişləndirmək öhdəliyini nümayiş etdirir.

Onun sözlərinə görə, şirkət texniki infrastrukturunun genişləndirilməsini yeni enerji güclərinin yaradılması, elektrik şəbəkəsinin təkmilləşdirilməsi və enerjinin əlçatanlığının artırılmasına yönəlmiş təşəbbüslərlə paralel həyata keçirəcək.