Türkiyənin Muğla vilayətinin Dalaman rayonunda sosial şəbəkələrdə Sedat Peker və onun ailəsini təhqir etdiyi iddia olunan M.A.S. silahlı hücuma məruz qalıb.

Türkiyə mətbuatı xəbər verir ki, hadisə oktyabrın 5-də axşam saatlarında baş verib.

Məlumata görə, naməlum şəxs və ya şəxslər M.A.S.-a silahla hücum edib. Hadisə yerinə polis və təcili tibbi yardım əməkdaşları cəlb olunub. Yaralanan şəxs xəstəxanaya çatdırılıb.

İlkin məlumatlara əsasən, M.A.S. son vaxtlar "TikTok" platformasında keçirdiyi canlı yayımlarda Sedat Peker və onun ailəsi barədə təhqiramiz ifadələr işlədib. Hücumun həmin paylaşımlarla əlaqəsinin olub-olmadığı araşdırılır.

Hadisə ilə bağlı araşdırma davam edir. Hücumun səbəbi və şübhəlilərin kimliyi barədə hələlik rəsmi açıqlama verilməyib.

Bundan əlavə, Sedat Peker "X" hesabında "medya3tr" hesabının hadisə ilə bağlı paylaşımını retvit edib. Həmin paylaşımda "TikTok" yayımlarında Peker və onun ailəsini təhqir etdiyi iddia olunan şəxsin Dalaman rayonunda silahlı hücuma məruz qaldığı bildirilib.

Bu iddia ilə bağlı da hələlik rəsmi qurumlar tərəfindən açıqlama verilməyib.