"50 faiz endirim marketinqin ən təsirli hiylələrindən biridir".

Bunu marketoloq Vlad Fişer gazeta.ru-ya açıqlamasında deyib.

Ekspert mağazaların məhsulun qiymətinin yarısından bu qədər asanlıqla imtina etməsinin səbəbini və alıcının aldadıldığını, yaxud həqiqətən sərfəli təkliflə qarşılaşdığını necə müəyyən edə biləcəyini açıqlayıb.

Ekspertin sözlərinə görə, mağaza məhsulu zərərlə sata bilməz. Əgər mağaza 50 faiz endirim edir və buna baxmayaraq qazanc əldə edirsə, deməli, məhsulun adi qiyməti ən azı iki dəfə şişirdilib. Endirim məhsulun indi ucuz olduğunu deyil, əvvəl baha satıldığını göstərə bilər. Əksər hallarda isə “köhnə” qiymət ümumiyyətlə mövcud olmayıb və endirim kampaniyasından bir neçə həftə əvvəl süni şəkildə müəyyənləşdirilib.

“Ən geniş yayılmış sxem belədir: əvvəlcə qiyməti qaldırırlar. Məsələn, köynək 1000 rubla satılır. Satıcı endirim kampaniyasından iki həftə əvvəl qiyməti 2000 rubla qaldırır. Sonra aksiya başlayır – 50 faiz endirimlə məhsulun qiyməti yenidən 1000 rubl olur. Əslində qiymət heç dəyişməyib. Yalnız üstündən xətt çəkilən rəqəm dəyişib”, deyə Fişer izah edib.

Üstündən xətt çəkilmiş qiymət məhsulun həqiqətən satıldığı qiymət olmaya bilər. Adətən bu, istehsalçının tövsiyə etdiyi qiymətdir. Qanunvericiliyə əsasən, endirim real qiymət əsasında hesablanmalıdır. Federal Antiinhisar Xidməti endirimi yalnız məhsulun adi satış qiymətindən hesablandığı halda dürüst hesab edir.

Onlayn marketpleyslərdə bu sxem daha asan tətbiq olunur: qiyməti cəmi bir neçə kliklə dəyişmək mümkündür. Satıcılar endirim kampaniyalarından əvvəl qiymətləri qaldırır, daha sonra isə “endirim” təqdim edərək əvvəlki qazanc səviyyəsini qoruyurlar. Federal Antiinhisar Xidməti məhsulların avtomatik olaraq endirim kampaniyalarına daxil edilməsi ilə bağlı marketpleyslərə xəbərdarlıq edib.

Nəticədə hər şey məhsula tətbiq olunan əlavədən asılıdır. Geyim, ayaqqabı, parfümeriya, kosmetika və mebel sahələrində qiymət əlavəsi çox vaxt 200-400 faiz təşkil edir. Buna görə də məhsulu 50 faiz endirimlə sataraq yenə də qazanc əldə etmək mümkündür. Ərzaq, dərman və elektronika məhsullarında isə qiymət əlavəsi adətən 10-30 faiz olur. Bu kateqoriyalarda 50 faizlik endirim satıcının zərərlə işləməsi demək ola bilər.

“Məhsulların və ya texnikanın üzərində -50 faiz endirim gördünüzsə, səbəbini araşdırın. Adətən ya məhsulun yararlılıq müddəti başa çatmaq üzrə olur, ya da model istehsaldan çıxarılıb. Heç kim məhsulu səbəbsiz yerə iki dəfə ucuz satmaz”, deyə Fişer xəbərdarlıq edib.

Əgər endirim bütün il boyu qüvvədədirsə, bu, artıq endirim deyil. Həmin rəqəm məhsulun real qiyməti ola bilər. Yanında göstərilən və üstündən xətt çəkilən qiymət isə yalnız alıcıda fürsəti yaxalamaq hissi yaratmaq üçün istifadə edilir.

Həqiqi endirimlər də olur. Məhsulun xarici görünüşündə qüsur olduqda, mağaza bağlandıqda, köhnə kolleksiya və ya anbarda qalan məhsullar satıldıqda qiymət həqiqətən aşağı salına bilər. Belə hallarda satıcı adətən endirimin səbəbini açıqlayır. Səbəb göstərilmirsə, məhsulun əvvəlki qiymət tarixçəsini yoxlamaq məsləhətdir.

“Yalnız bu gün” və “kampaniyanın son günü” kimi ifadələr alıcının qiymətləri müqayisə etməyə vaxt tapmaması üçün istifadə olunur. Belə reklam həftələrlə davam edirsə, onun həqiqətə uyğun olmadığı hesab edilə bilər. Bununla bağlı Federal Antiinhisar Xidmətinə şikayət etmək mümkündür.

Ekspertin sözlərinə görə, endirim əslində pula qənaət etdirmir, insanı pul xərcləməyə sövq edir. “Qənaət odur ki, onsuz da almağı planlaşdırdığınız məhsulu daha ucuz qiymətə alırsınız. Qalan hər şey sadəcə pul xərcləməkdir”, deyə Fişer yekunlaşdırıb.

Paşa Məmmədli