Fransanın Korsika adası üzərində nadir atmosfer hadisəsi - "qırmızı spraytlar" qeydə alınıb.

Oxu.Az xəbər verir ki, fransalı fotoqraf Florian Riu "LinkedIn" hesabında bu nadir hadisəni lentə almaq imkanını əvvəlcədən hesabladığını bildirib.

Qırmızı spraytlar güclü tufanların üzərində, atmosferin təxminən 50-90 kilometr hündürlüyündə yaranan qısamüddətli elektrik boşalmalarıdır. Onlar elektrik sahəsinin təsiri altında seyrəkləşmiş qazların işıqlanması nəticəsində meydana gəlir. Molekulyar azotun işıqlanması səbəbindən adətən qırmızı rəngdə görünən bu hadisə şaquli sütunlar, şaxələnən saplar və ya meduzaya bənzər formalar ala bilər. Bu parıltılar cəmi bir neçə millisaniyə davam edir, hündürlüyü isə on kilometrlərlə ölçülə bilər.

Adi ildırımlardan fərqli olaraq, spraytlar buludla yer arasında deyil, tufan buludlarından xeyli yuxarıda, mezosferdə yaranır. Onlar, bir qayda olaraq, güclü ildırım boşalmalarına cavab olaraq meydana gəlir. Spraytların mövcudluğuna dair ilk inandırıcı instrumental sübutlar 1989-cu ildə əldə edilib.