"Tandem Health"in maliyyələşdirmə raunduna "EQT"nin "Scaleup Europe Fund" fondu rəhbərlik edib.

Valyuta.az xəbər verir ki, Stokholmda yerləşən səhiyyə texnologiyaları startapı "Tandem Health" süni intellekt əsaslı klinika əməliyyat sistemi hazırlamaq və fəaliyyətini genişləndirmək məqsədilə 100 milyon dollar investisiya cəlb edib.

Bununla da şirkətin indiyədək cəlb etdiyi ümumi maliyyələşdirmə 160 milyon dollara çatıb. "Kinnevik", "Northzone", "Amino Collective" və "Visionaries Club" da yeni investisiya raundunda iştirak ediblər.

"EQT"nin idarə etdiyi "Scaleup Europe Fund"un "Tandem Health"ə yatırdığı sərmayə fondun səhiyyə sektorundakı ilk investisiyasıdır. Fond Avropanın aparıcı texnologiya şirkətlərinin regionda qalmasını və böyüməsini dəstəkləmək məqsədilə yaradılıb.

"Tandem Health" 2025-ci ildə 50 milyon dollarlıq A seriyalı maliyyələşdirmə raundu keçirib. Yeni raundda iştirak edən investorların hamısı əvvəlki maliyyələşdirmədə də sərmayə yatırıb.

Şirkətin proqram təminatı həkimlərə və digər tibb mütəxəssislərinə klinik qeydlərin hazırlanmasında kömək edir. Süni intellekt köməkçisi konsultasiyaları emal edir, qeydlər aparır, ödəniş kodları təklif edir, klinik qərarların qəbuluna dəstək göstərir və tələb olunan sənədləşdirmə işlərini avtomatik tamamlayır.

Məlumata görə, süni intellekt əsaslı tibbi sənədləşdirmə alətindən hazırda Avropanın 14 ölkəsində 10 mindən çox səhiyyə təşkilatı istifadə edir.

"Tandem Health" cəlb etdiyi yeni investisiyadan süni intellekt əsaslı "Clinic Operating System" platformasının hazırlanması üçün istifadə etməyi planlaşdırır.

Həmçinin, platforma xəstə axınının idarə edilməsini mövcud tibbi sənədləşdirmə və kodlaşdırma alətləri ilə birləşdirəcək. Şirkət bununla yalnız tibbi sənədləşdirmə sahəsində deyil, klinikaların gündəlik əməliyyatlarının idarə edilməsində də fəaliyyətini genişləndirməyi hədəfləyir.

Qeyd edək ki, "Tandem Health" Avropanın səhiyyə sistemləri üçün süni intellekt əsaslı proqram təminatı hazırlayan Stokholm mərkəzli startapdır. Şirkətin strategiyası Avropanın parçalanmış və ciddi şəkildə tənzimlənən səhiyyə bazarlarında müvafiq sertifikatlaşdırma tələblərinə uyğun şəkildə genişlənməkdir.