Podkast sənayesində iri platformalar uğurlu kontent yaradıcılarını cəlb etmək üçün böyük məbləğlər ödəməyə başlayıb. Bunun son nümunələrindən biri britaniyalı aparıcı və sahibkar Jay Shettynin “On Purpose” podkastıdır.

Shetty podkastını Netflix və Spotify ilə çoxillik razılaşma çərçivəsində video formatında bu iki platformaya gətirəcək. Müqavilənin dəyərinin 100 milyon dollara qədər olduğu bildirilir. Lakin tərəflər müqavilənin maliyyə şərtlərini rəsmi açıqlamayıb.

“On Purpose” şəxsi inkişaf, sağlamlıq və həyat tərzi mövzularında tanınmış şəxslərlə müsahibələri ilə məşhurdur. Podkastın YouTube-da 5 milyondan çox abunəçisi olduğu bildirilir.

Bu razılaşma podkastların media bazarındakı rolunun dəyişdiyini göstərir. Əvvəllər əsasən audio məzmun kimi qəbul edilən podkastlar indi video, reklam, yayım hüquqları və eksklüziv müqavilələrlə böyük media məhsuluna çevrilir.

Bunun ən böyük nümunələrindən biri Joe Rogandır. Spotify 2024-cü ildə “The Joe Rogan Experience” üçün çoxillik yeni müqavilə bağlayıb. Müqavilənin dəyərinin 250 milyon dollara qədər olduğu bildirilib. Yeni razılaşma əvvəlki müqavilədən fərqli olaraq podkastı Spotify-a eksklüziv etmirdi və məzmunun YouTube və digər platformalarda da yayımlanmasına imkan verirdi.