Paytaxtın Sabunçu rayonu, Bakıxanov qəsəbəsi, Muxtar Fətəliyev küçəsi, 78 ünvanında yerləşən məcburi köçkünlərin məskunlaşdığı yataqxanada sakinlər antisanitar vəziyyətdən şikayətçidirlər.

Sakinlərin Baku TV-nin qaynar xəttinə müraciətinə əsasən, binanın zirzəmisinə çirkab suları dolur və problem artıq illərdir həll olunmur.

Onların sözlərinə görə, məsələ ilə bağlı Sabunçu Rayon İcra Hakimiyyətinə və Azərbaycan Dövlət Su Ehtiyatları Agentliyinə dəfələrlə müraciət edilib, lakin nəticə olmayıb.


Zirzəmidə uzun müddət toplanan çirkab suları kəskin qoxuya və antisanitar vəziyyətə səbəb olur. Sakinlər isti yay aylarını da bu şəraitdə keçirməyə məcbur olublar.

Problemlə yanaşı, ərazidə məişət tullantıları üçün zibil konteynerlərinin olmaması da narazılıq yaradır. Sakinlər tullantılarını başqa ərazilərdəki konteynerlərə aparmaq məcburiyyətində qaldıqlarını bildirirlər.

Sakinləri qarşıdan gələn payız mövsümü də narahat edir. Yağıntıların artması ilə zirzəmidəki çirkab sularına yağış sularının da qarışacağı və vəziyyətin daha da ağırlaşacağı gözlənilir.