E-poçt gündəlik ünsiyyətdə əhəmiyyətini qoruyarkən, spam və dələduzluq məqsədli mesajlar da istifadəçilər üçün ciddi təhlükəsizlik riski yaratmaqda davam edir.

Valyuta.az xəbər verir ki, istifadəçilərin gələnlər qutusunda qısa müddət ərzində çox sayda spam və ya şübhəli mesaj görməsinin müxtəlif səbəbləri var. Bunlardan biri e-poçt ünvanlarının məlumat sızmalarından sonra kibercinayətkarların əlinə keçməsidir. Şirkətlərin yanlış konfiqurasiyaları və ya təhlükəsizlik boşluqları səbəbindən ictimaiyyətə açıq hala gələn e-poçt ünvanlarından da spam və fişinq kampaniyalarında istifadə edilə bilər.

Süni intellekt alətlərinin geniş yayılması da dələduzluq cəhdlərinin daha inandırıcı olmasına səbəb olur. "ESET"in qiymətləndirməsinə görə, hücum edənlər süni intellekt əsaslı alətlərdən istifadə etməklə daha təbii görünən və ənənəvi spam filtrlərindən yayınmağa çalışan fişinq mesajları hazırlaya bilirlər. Açıq mənbələrdəki məlumatlardan da istifadəçilərin e-poçt ünvanlarını müəyyənləşdirmək üçün yararlanmaq mümkündür.

Göndərən məlumatları diqqətlə yoxlanılmalıdır

Mütəxəssislərin ən vacib tövsiyələrindən biri gözlənilməz və ya şübhəli e-poçtlardakı bağlantılara klikləməmək və bu mesajlara cavab verməməkdir. Bankdan, şirkətdən və ya xidmət təminatçısından göndərildiyi iddia edilən mesajın həqiqiliyinə əmin olunmadıqda, e-poçtdakı əlaqə məlumatlarından istifadə etmək əvəzinə həmin qurumla rəsmi kanallar vasitəsilə əlaqə saxlamaq tövsiyə olunur.

Göndərənin ünvanındakı domeni diqqətlə yoxlamaq da fişinq cəhdlərini müəyyənləşdirməyə kömək edə bilər. Xüsusilə tanınmış brendlərin domenlərinə bənzəyən, lakin kiçik yazı fərqləri olan ünvanlar dələduzluq cəhdinin əlaməti ola bilər.

İstifadəçilərə özlərinin başlatmadığı çoxfaktorlu autentifikasiya (MFA) bildirişlərini və ya cihaz kodlarını təsdiqləməmələri də tövsiyə olunur. Gözlənilməz təsdiqləmə tələbləri başqa bir şəxsin hesaba giriş etməyə çalışdığını göstərə bilər.

Əsas e-poçt ünvanından hər yerdə istifadə etməmək də tədbir ola bilər

"ESET" alış-veriş saytlarında və ya yeni onlayn xidmətlərdə qeydiyyatdan keçərkən marketinq icazələrinin diqqətlə yoxlanılmasını, mümkün hallarda isə e-poçt maskalama xidmətlərindən istifadə edilməsini tövsiyə edir. Bu üsullar əsas e-poçt ünvanının müxtəlif platformalarda yayılmasını məhdudlaşdıra bilər.

Sosial media hesablarında e-poçt ünvanının hamı üçün açıq şəkildə paylaşılmaması da avtomatik məlumat toplama vasitələrinin bu məlumatlara çıxışını çətinləşdirə bilər. İstifadəçilər həmçinin e-poçt ünvanlarının əvvəllər baş vermiş məlumat sızmalarında yer alıb-almadığını yoxlayan xidmətlərdən istifadə etməklə mümkün riskləri izləyə bilərlər.

"Abunəlikdən çıx" bağlantıları hər zaman təhlükəsiz olmaya bilər

İstənməyən e-poçtlardakı "abunəlikdən çıx" bağlantılarına da ehtiyatla yanaşmaq lazımdır. Naməlum və ya etibarsız mənbələrdən gələn mesajlardakı bu cür bağlantılar bəzi hallarda istifadəçinin e-poçt ünvanının aktiv olduğunu təsdiqləyə və ya zərərli internet saytına yönləndirə bilər.

Şübhəli e-poçtların əlavələri də açılmamalıdır. Bu fayllar istifadəçilərin cihazlarına zərərli proqram təminatı yükləmək və ya hesab məlumatlarını ələ keçirmək məqsədilə hazırlanmış ola bilər.

Mütəxəssislər həmçinin istənməyən mesajlar vasitəsilə şəxsi məlumatların, bank məlumatlarının və ya hesab giriş məlumatlarının paylaşılmaması lazım olduğunu vurğulayırlar. E-poçt xidmətlərində təhlükəsizlik və spam filtrlərinin deaktiv edilməməsi, mümkün hallarda isə müasir təhlükəsizlik həllərindən istifadə olunması da görülə biləcək tədbirlər sırasındadır.

Spam və dələduzluq mesajlarını tamamilə aradan qaldırmaq mümkün olmasa da, göndərəni yoxlamaq, şübhəli bağlantı və əlavələrdən uzaq durmaq, həmçinin hesabların təhlükəsizlik parametrlərini aktual saxlamaq bu cür hücumların yarada biləcəyi riskləri azalda bilər.