Prezident Donald Trampın xüsusi elçisi Stiv Uitkoff və kürəkəni Cared Kuşner Ukrayna münaqişəsi də daxil olmaqla, qlobal sülh sazişləri üzrə danışıqlara cəlb olunub.

Teleqraf "Fox Radio"ya istinadla xəbər verir ki, bunu ABŞ-nin dövlət katibi Marko Rubio açıqlayıb.

O bildirib ki, ABŞ-nin missiyası sırf sülh sazişləri üzrə danışıqlar aparmaq olan adamları var.

"Bu, Stiv Uitkoffdur, indi isə prosesə Cared Kuşner də qoşulub".

Rubio vurğulayıb ki, həm Uitkoff, həm də Kuşner öz vaxtlarının 100%-ni qlobal münaqişələrin dayandırılması və sülh müqavilələrinin hazırlanması üzrə gizli və açıq danışıqlara həsr edirlər.

Dövlət katibi əlavə edib ki, hər bir xarici siyasət xətti üçün fərdi komandalar qurulsa da, bütün iştirakçılar Ağ Evin ümumi strateji yanaşması çərçivəsində sıx koordinasiyalı şəkildə fəaliyyət göstərirlər.