ABŞ Prezidenti Donald Tramp ölkədə və xaricdə yaranan problemlərə görə məsuliyyəti öz üzərinə götürmək əvəzinə, günahı sələflərinin, Konqresin və digər qüvvələrin üzərinə atmaqda davam edir.
"Associated Press" (AP) yazır ki, Trampın bu davranışı artıq onun siyasi strategiyasının bir hissəsinə çevrilib. İqtisadiyyatın zəifləməsi və inflyasiyanın yüksək qalmasından danışarkən prezident əvvəlki administrasiyanı günahlandırır. İranla müharibənin yaratdığı iqtisadi və siyasi problemləri isə əvvəlki prezidentlərin Tehrana qarşı kifayət qədər sərt siyasət yürütməməsi ilə əlaqələndirir.

Tramp hətta Vaşinqtondakı Linkoln memorialının hovuzunun təmiri ilə bağlı yaranan problemlərə görə də vandalizmi səbəb göstərib. Halbuki prokurorluq zərərin keyfiyyətsiz iş nəticəsində yarandığını bildirib.

Tramp son çıxışlarından birində ABŞ-da hakimiyyətə gəldikləri zaman “tam fəlakət miras aldıqlarını” deyib. Onun sözlərinə görə, yüksək qiymətlər də əvvəlki administrasiyadan qalıb.

Lakin sorğular amerikalıların iqtisadi vəziyyətlə bağlı narazılığının artdığını göstərir. AP-NORC araşdırmasına əsasən, Trampın iqtisadi məsələlər üzrə reytinqi 2025-ci ilin martında 40 faiz olduğu halda, 2026-cı ilin iyulunda 32 faizə düşüb.

Siyasi analitiklər hesab edirlər ki, Trampın məsuliyyəti başqalarının üzərinə atması noyabrda keçiriləcək aralıq seçkiləri ərəfəsində Respublikaçılar üçün problem yarada bilər. Çünki seçicilər gündəlik problemlərinin həllində prezidentdən daha çox məsuliyyət və konkret nəticə gözləyirlər.

Tarixçi Nikol Anslover bildirib ki, ABŞ prezidentləri adətən çətin qərarların nəticələrinə görə məsuliyyəti üzərlərinə götürüblər.

Məsələn, Harri Trumen prezidentlik dövründə “Məsuliyyət burada dayanır” ifadəsini məşhurlaşdırmışdı. Con Kennedi uğursuz Donuzlar körfəzi əməliyyatına görə məsuliyyəti qəbul etmiş, Ronald Reyqan isə İran-Kontra qalmaqalında üzr istəmişdi.

AP qeyd edir ki, Tramp isə bunun əksinə olaraq siyasi uğursuzluqlarda belə məsuliyyəti üzərinə götürməkdən yayınır. O, hətta Respublikaçılar noyabr seçkilərində Konqresdə çoxluğu itirsələr, bunun günahını öz üzərinə götürməyəcəyini əvvəlcədən bildirib.

Nəticədə Trampın siyasi üslubu belə bir mənzərə yaradır: prezident hər şeyə nəzarət etmək iddiasındadır, lakin işlər pis gedəndə məsuliyyət başqa ünvana yönəlir.