ABŞ Yaxın Şərqdə hərbi mövcudluğunu gücləndirir. Kaliforniyadan “USS Theodore Roosevelt” aviadaşıyıcısı və müşayiət gəmiləri, həmçinin üç desant gəmisi və dəniz piyadaları bölgəyə göndərilir.
Verilən məlumata görə, təxminən 10 min amerikalı hərbçinin noyabrda regiona çataraq mümkün əməliyyatlara hazır olması gözlənilir.

“USS George H.W. Bush” və “USS George Washington” aviadaşıyıcıları da bölgədə qalarsa, ABŞ-ın Yaxın Şərqdə üç aviadaşıyıcı qrupu və təxminən 60 min hərbçisi olacaq.

ABŞ Prezidenti Donald Tramp daha əvvəl Konqresə aralıq seçkilər başa çatana qədər genişmiqyaslı hərbi əməliyyatların planlaşdırılmadığını bildirmişdi. Bununla belə, o, İrana qarşı yeni zərbələrin mümkünlüyünü istisna etməyib.

ABŞ kəşfiyyatının keçmiş əməkdaşı Maykl Preqent isə “USS Theodore Roosevelt”in göndərilməsinin bölgədəki qüvvələrin növbəti rotasiyası ola biləcəyini deyib. Onun fikrincə, Vaşinqton bununla Tehrana sərt hərbi qərarlar qəbul etmək imkanını qoruduğu mesajını verir.