“Morgan Stanley” rəqəmsal aktivlər sahəsində fəaliyyətini genişləndirərək stabilkoinlər, aktivlərin tokenizasiyası və mərkəzləşdirilməmiş maliyyə (DeFi) texnologiyalarını sınaqdan keçirmək üçün xüsusi laboratoriya yaradıb.

Valyuta.az xəbər verir ki, bankın yaratdığı “Digital Asset Lab” kriptovalyuta və blokçeyn texnologiyalarının əsas bank sistemlərindən təcrid olunmuş mühitdə sınaqdan keçirilməsinə imkan verəcək.

Yeni laboratoriyada stabilkoinlərlə yanaşı, tokenləşdirilmiş depozitlər, mərkəzi bankların rəqəmsal valyutaları (CBDC), tokenləşdirilmiş pul bazarı fondları və digər rəqəmsal aktivlər araşdırılacaq.

“Morgan Stanley”nin rəqəmsal aktivlər üzrə rəhbəri Emi Oldenburq bildirib ki, laboratoriyanın əsas məqsədlərindən biri yeni texnologiyaları təhlükəsiz və tənzimləyici tələblərə uyğun şəraitdə sınaqdan keçirməkdir.

Bank DeFi seyflərini sınaqdan keçirir

“Morgan Stanley”nin xüsusi maraq göstərdiyi istiqamətlərdən biri DeFi seyfləri (“vault”) texnologiyasıdır.

Bu sistem investorların yatırdığı stabilkoinlər və digər rəqəmsal aktivləri əvvəlcədən müəyyən edilmiş strategiyalar əsasında müxtəlif DeFi bazarlarında avtomatik yerləşdirə bilir.

Mexanizm müəyyən mənada ənənəvi investisiya fondlarını xatırladır. Əsas fərq isə blokçeyn texnologiyasının aktivlərin yerləşdirilməsi, idarə olunması və digər əməliyyatların bir hissəsini avtomatlaşdırmağa imkan verməsidir.

Oldenburqun sözlərinə görə, gələcəkdə DeFi seyfləri maliyyə bazarlarının bir hissəsinə çevrilə bilər. Bununla belə, texnologiya hələ inkişafının ilkin mərhələsindədir. Bu səbəbdən bank onu daha geniş maliyyə platformalarına inteqrasiya etməzdən əvvəl iş mexanizmini və mümkün riskləri ətraflı öyrənmək niyyətindədir.

Kriptovalyuta biznesi də genişlənir

Laboratoriyanın yaradılması “Morgan Stanley”nin rəqəmsal aktivlər bazarında fəaliyyətini genişləndirdiyi bir dövrə təsadüf edir.

Bank bu istiqamətdə yalnız yeni blokçeyn texnologiyalarını araşdırmaqla kifayətlənmir. “Morgan Stanley” həmçinin “E*Trade” platforması vasitəsilə kriptovalyuta ticarəti xidmətini istifadəyə verməklə rəqəmsal aktivlər biznesini genişləndirir.