Elektron poçt xidmətləri spam və arzuolunmaz mesajların böyük hissəsini avtomatik bloklasa da, bəzi təhlükəli məktublar filtrdən yayına bilir. Xüsusilə fişinq mesajlarındakı keçidlərə daxil olmaq və naməlum faylları yükləmək hesabların ələ keçirilməsinə, bank məlumatlarının oğurlanmasına və cihazın zərərli proqramlarla yoluxmasına səbəb ola bilər.

Valyuta.az xəbər verir ki, ESET mütəxəssisləri spam və fişinqdən qorunmaq üçün bir sıra tövsiyələr hazırlayıb.

Spam niyə qəfil artır?

Mütəxəssislərin fikrincə, elektron poçt ünvanına arzuolunmaz məktubların kəskin şəkildə çoxalmasının bir neçə səbəbi ola bilər:

1. Məlumat sızması.

Şirkət və ya onlayn xidmətlərin sistemlərinə hücum nəticəsində elektron poçt ünvanları oğurlana və sonradan fırıldaqçılıq kampaniyalarında istifadə edilə bilər.

2. Yeni kibercinayət alətləri.

Fırıldaqçılar artıq tanınmış brendləri təqlid edən, zərərli proqramları gizlədən və fişinq mesajlarını daha inandırıcı göstərən hazır vasitələrdən istifadə edirlər.

3. Süni intellekt.

Süni intellekt fişinq məktublarının daha peşəkar hazırlanmasına, spam filtrlərinin keçilməsinə və internetdə elektron poçt ünvanlarının avtomatik axtarılmasına imkan verir.

4. Spam hücumu.

Bəzən yüzlərlə məktubun eyni vaxtda göndərilməsi istifadəçinin diqqətini yayındırmaq üçün edilir. Məqsəd bankdan gələn təhlükəsizlik xəbərdarlığı və ya istifadəçinin etmədiyi alışla bağlı bildiriş kimi vacib mesajın çoxsaylı məktublar arasında gözdən qaçmasına nail olmaqdır.

5. Açıq internet resurslarından məlumat toplanması.

Botlar sosial şəbəkələr və digər açıq internet səhifələrini skan edərək istifadəçilərin elektron poçt ünvanlarını toplaya bilirlər.

Özünüzü necə qorumaq olar?

Mütəxəssislər sosial şəbəkələrdə hesabların məxfilik parametrlərini gücləndirməyi və elektron poçt ünvanını mümkün qədər açıq şəkildə paylaşmamağı tövsiyə edir.

Naməlum göndəricilərdən gələn məktublardakı keçidlərə daxil olmaq və cavab yazmaq olmaz. Məktubun həqiqiliyini yoxlamaq lazım gəldikdə göndəricinin əlaqə məlumatlarını məktubun özündən deyil, rəsmi mənbələrdən tapmaq daha təhlükəsizdir.

Yeni xidmətlərdə qeydiyyatdan keçərkən əsas elektron poçt ünvanı əvəzinə “elektron poçtumu gizlət” kimi funksiyalardan istifadə etmək də məlumat sızması riskini azalda bilər.

Həmçinin şəxsi məlumatların internetdə, o cümlədən “darknet”də yayılıb-yayılmadığını yoxlayan təhlükəsizlik xidmətlərindən istifadə etmək mümkündür. Spam və fişinqdən qoruyan təhlükəsizlik həlləri də riskləri azaltmağa kömək edir.

Onlayn alış-veriş zamanı ehtiyac olmadıqda marketinq və reklam göndərişlərinə abunə olmamaq da poçt qutusuna daxil olan spamın həcmini azalda bilər.

Bunları heç vaxt etməyin

Mütəxəssislər spam və şübhəli məktublarla bağlı aşağıdakı qaydalara əməl etməyi tövsiyə edir:

* Spam məktubundakı “Abunəlikdən çıx” düyməsinə basmayın və ona cavab verməyin. Bu, elektron poçt ünvanınızın aktiv olduğunu fırıldaqçıya göstərə bilər.
* Naməlum məktublardakı faylları açmayın. Onlar zərərli proqram ehtiva edə bilər.
* Şübhəli məktublara şəxsi, maliyyə məlumatlarınızı və giriş məlumatlarınızı göndərməyin.
* Pulsuz hədiyyə, xidmət və ya ictimai Wi-Fi əldə etmək üçün əsas elektron poçt ünvanınızdan istifadə etməyin.
* Alış-verişdən sonra onlayn mağazalarda elektron poçt, ev ünvanı və bank kartı məlumatları kimi şəxsi məlumatları ehtiyac olmadığı halda saxlamayın.
* Elektron poçtun təhlükəsizlik parametrlərini zəiflətməyin və spam filtrinin səviyyəsini aşağı salmayın.

Mütəxəssislər bildirirlər ki, elektron poçta qarşı hücum üsulları daim inkişaf etdiyindən istifadəçilərin də kibergigiyena qaydalarına əməl etməsi və təhlükəsizlik vasitələrindən yararlanması vacibdir.