Ucuz və ya keyfiyyətsiz benzindən istifadə avtomobilin mühərriki və yanacaq sistemi üçün ciddi problemlər yarada bilər.

Rusiyalı mütəxəssis Sergey Pletnyov Gazeta.ru-ya açıqlamasında keyfiyyətsiz yanacaqdan istifadə zamanı, ilk növbədə, hansı detalların sıradan çıxa biləcəyini açıqlayıb.

"Keyfiyyətsiz yanacaq səbəbindən, ilk növbədə, alışdırma şamları, yanacaq injektorları, filtrlər, benzin nasosu, həmçinin katalitik neytrallaşdırıcı və oksigen datçikləri zədələnir", - deyə mütəxəssis izah edib.

Onun sözlərinə görə, natamam yanma və yanacaqdakı qatqılar səbəbindən alışdırma şamlarının üzərində ərp yaranır. Bu isə alışdırma buraxılışlarına və mühərrikin boş gedişdə qeyri-sabit işləməsinə səbəb olur.

İnjektorlar qatran və digər çöküntülərlə tıxanaraq yanacağın püskürtmə dəqiqliyini itirir. Ağır hallarda isə onlar tam bağlanmır və silindrlərin yanacaqla həddindən artıq dolmasına səbəb olur.

Yanacaq filtri və nasos asılı hissəciklər, eləcə də su ilə tez çirkləndiyindən, nasos həddindən artıq yüklənərək sıradan çıxa bilər.

Ekspert qeyd edib ki, katalitik neytrallaşdırıcı və oksigen datçikləri kükürd və tərkibində metal olan qatqılardan zərər görür. Bu isə onların səmərəliliyinin azalmasına və işlənmiş qazların təmizlənməsi sistemində xətaların yaranmasına gətirib çıxara bilər.

Mütəxəssis yalnız müsbət reputasiyaya malik, etibarlı yanacaqdoldurma məntəqələrindən istifadə etməyi və yanacağın keyfiyyətinə qənaət etməməyi məsləhət görüb.

O vurğulayıb ki, keyfiyyətli yanacaqla şübhəlimənşəli benzin arasındakı qiymət fərqi yanacaq sisteminin təmiri, katalizatorun və ya injektorların dəyişdirilməsi xərcləri ilə müqayisədə çox kiçikdir.