TikTok son illərdə təkcə əyləncə və sosial şəbəkə platforması deyil, həm də istifadəçilərin gəlir əldə edə bildiyi platformalardan birinə çevrilib. Burada pul qazanmağın əsas üsullarından biri canlı yayımlar zamanı izləyicilər tərəfindən göndərilən virtual hədiyyələrdir.

Valyuta.az xəbər verir ki, sistem kifayət qədər sadə işləyir. İzləyici əvvəlcə TikTok-un “Pul kisəsi” bölməsindən “coin” adlı virtual sikkələr alır. Bu sikkələr real pulla satın alınır və daha sonra canlı yayım zamanı bəyəndiyi kontent yaradıcılarına müxtəlif hədiyyələr göndərmək üçün istifadə olunur. Hədiyyələrdən istifadə etməklə izləyicilər canlı yayımçını dəstəkləyir və onun təqdim etdiyi məzmuna görə virtual şəkildə ödəniş etmiş olurlar. 100 "coin" 1,29 dollar (təxmini 2 manat) dəyərindədir.

Göndərilən hədiyyələr birbaşa nağd pul formasında yayımçının hesabına keçmir. Onlar platformanın daxili sistemində müəyyən dəyərə malik virtual aktivlərə çevrilir. Yayımçı topladığı almazları daha sonra müəyyən qaydalar əsasında real pula çevirə bilir. TikTok müəyyən faizdə öz payını və müvafiq ödənişləri çıxır. Belə ki, “TikTok"da hədiyyələrdən 44-48 %-ə yaxın hissəsinin platformanın özünə, geri qalan 52 % və üzərinin isə istifadəçiyə çatır.

Məsələn, təqdim olunan hesablamalara əsasən, 6 000 almazın platformadakı dəyəri 127,20 dollar göstərilir. Nağdlaşdırma zamanı isə yayımçının əldə etdiyi məbləğ təxminən 63,60 dollar olur. Başqa sözlə, virtual hədiyyəyə xərclənən pulun müəyyən hissəsi platformada qalır.

TikTok-da hədiyyələrin qiyməti isə çox geniş diapazonda dəyişir. Ən sadə və ucuz hədiyyələrdən başlayaraq yüzlərlə manat dəyərində olan virtual hədiyyələrə qədər müxtəlif seçimlər mövcuddur. Bəzi hədiyyələrin qiyməti minlərlə, hətta on minlərlə jetona çatır. "TikTok"da canlı yayımlar zamanı pul şəklində hədiyyələr göndərilir. Hədiyyələrin ən kiçiyi güldür (0,1 qəpik), ən böyüyü isə "TikTok" jetonu hesab olunur (800 manatdan artıq). Bu qiymətlər göndərilən şəxsə çatan məbləğdir. Göndərən isə həmin hədiyyəni daha böyük məbləğə alır.

Ən bahalı hədiyyələr arasında “TikTok Universe” 44 999 jeton, “TikTok Stars” 39 999 jeton, “Leon və Aslan” 34 000 jeton, “Balina” 30 000–34 000 jeton, “Aslan” və “Qızıl idman avtomobili” 29 999 jeton, “Əjdaha” 26 999 jeton, “Qrifon” 25 999 jeton və “Yaxta” 20 000 jetonla təqdim olunur.

Mənbədəki hesablamaya görə, 1 000 jeton təxminən 20 manat hesablandıqda, 30 000 jetonlu “Aslan” hədiyyəsinin dəyəri təxminən 600 manat edir. 40 000 jetonlu bir hədiyyənin dəyəri isə təxminən 800 manata çatır. Burada nəzərə almaq lazımdır ki, bu məbləğ hədiyyənin virtual sistemdəki dəyəridir və həmin pulun hamısı canlı yayımçının hesabına köçmür.

TikTok-da böyük gəlir əldə etmək üçün əsas amillərdən biri geniş izləyici auditoriyasına sahib olmaqdır. Canlı yayım zamanı nə qədər çox izləyici aktiv iştirak edir və hədiyyə göndərirsə, yayımçının topladığı virtual gəlir də bir o qədər artır. Buna görə bəzi kontent yaradıcıları canlı yayımları əsas gəlir mənbələrindən birinə çevirirlər.

Nəticə etibarilə, TikTok-un hədiyyə sistemi izləyici ilə kontent yaradıcısı arasında virtual ödəniş mexanizmi yaradır. İzləyici real pulla coin alır, həmin coinlə hədiyyə göndərir, yayımçı isə bu hədiyyələrdən almaz toplayaraq onları müəyyən şərtlərlə pula çevirir. Platforma isə bu prosesdən öz payını götürür. Buna görə TikTok-da hədiyyənin izləyiciyə başa gələn qiyməti ilə yayımçının son nəticədə əldə etdiyi gəlir arasında ciddi fərq yarana bilər.