“Samsung” və “Apple” arasındakı reklam rəqabətinə yeni bir epizod əlavə olunub.

Valyuta.az xəbər verir ki, “Samsung” “Galaxy Z Fold 8” üçün hazırladığı yeni reklamda “Apple” şirkətinin baş icraçı direktoru Tim Kuka bənzəyən və onunla eyni adı daşıyan şəxsdən istifadə edib.

Lakin reklamda görünən şəxs “Apple”ın rəhbəri deyil. “Samsung” Yeni Zelandiyanın Palmerston-Nort şəhərində yaşayan və həqiqətən də Tim Kuk adlı şəxsi kamera qarşısına keçirib. Onun “Apple” rəhbərinə fiziki bənzərliyi isə reklamın əsasını təşkil edib.

“Samsung” reklamı “Apple” təqdimatlarını təqlid edir

“Samsung” reklamı “Apple”ın qatlanan “iPhone Duo” modelini təqdim etdiyi dövrdə yayımlayıb. Şirkət videoda “Apple”ın məhsul təqdimatlarında istifadə etdiyi kinematoqrafik üsluba bənzər quruluşdan yararlanıb.

Reklamdakı Tim Kuk “Galaxy Z Fold 8”i nümayiş etdirərkən “Gələcək buradadır” ifadəsini işlədir. “Samsung” həmçinin “Apple”ın Tim Kukuna eyham vuran digər detallara da yer verib. Bunlardan biri Kukun qısa müddət əvvəl dəyişdirdiyi profil fotosuna işarə edir.

Beləliklə, “Samsung” “Apple” rəhbərinin özünü birbaşa reklamına cəlb etmədən, ad və xarici görünüş oxşarlığından istifadə etməklə rəqibinə göndərmə edib.