Videooyun sənayesi son illərdə dünyanın ən böyük əyləncə bazarlarından birinə çevrilib. Sektor böyüdükcə texnologiya və oyun nəhəngləri məşhur studiyaları, oyun seriyalarını və mobil oyun şirkətlərini portfellərinə qatmaq üçün milyardlarla dollar xərcləyiblər.

Valyuta.az oyun sənayesində həyata keçirilmiş ən böyük satınalmalardan bəzilərini təqdim edir.

“Activision Blizzard” – 68,7 milyard dollar

Oyun sənayesi tarixinin ən böyük satınalmalarından biri “Microsoft” tərəfindən həyata keçirilib.

Şirkət “Activision Blizzard”ı 68,7 milyard dollarlıq sövdələşmə ilə əldə edib. Satınalma 2023-cü ildə tamamlanıb.

Bu razılaşma nəticəsində “Call of Duty”, “World of Warcraft”, “Diablo”, “Overwatch” və “Candy Crush” kimi məşhur oyun və seriyalar “Microsoft”un oyun biznesinin bir hissəsinə çevrilib.

“Zynga” – 12,7 milyard dollar

“Grand Theft Auto” və “Red Dead Redemption” kimi oyunlarla tanınan “Take-Two Interactive” 2022-ci ildə mobil oyun istehsalçısı “Zynga”nın alınmasını tamamlayıb.

Sövdələşmənin dəyəri təxminən 12,7 milyard dollar olub.

“Zynga” xüsusilə “FarmVille”, “Zynga Poker” və digər mobil və sosial oyunları ilə tanınıb. Satınalma “Take-Two Interactive”in mobil oyun bazarındakı mövqeyini əhəmiyyətli dərəcədə genişləndirib.

“Supercell” – 8,6 milyard dollar

2016-cı ildə “Tencent”in rəhbərlik etdiyi konsorsium Finlandiyanın “Supercell” şirkətinin 84,3%-lik payını təxminən 8,6 milyard dollara əldə edib.

Burada söhbət şirkətin tam satın alınmasından deyil, nəzarət paketinin əldə edilməsindən gedir.

“Supercell” “Clash of Clans”, “Clash Royale”, “Hay Day” və “Brawl Stars” kimi məşhur mobil oyunların yaradıcısıdır.

“ZeniMax Media” – 7,5 milyard dollar

“Microsoft”un oyun sənayesindəki digər böyük satınalması “ZeniMax Media” olub.

Şirkət 2021-ci ildə “ZeniMax Media”nı 7,5 milyard dollara əldə edib.

Sövdələşmə nəticəsində “Bethesda Game Studios”, “id Software”, “Arkane Studios” və digər oyun studiyaları “Microsoft”un tərkibinə keçib. Bununla yanaşı, “The Elder Scrolls”, “Fallout”, “DOOM” və “Dishonored” kimi tanınmış oyun seriyaları da şirkətin portfelinə daxil olub.

“Scopely” – 4,9 milyard dollar

Səudiyyə Ərəbistanının Dövlət İnvestisiya Fonduna bağlı “Savvy Games Group” 2023-cü ildə mobil oyun şirkəti “Scopely”ni 4,9 milyard dollara satın alıb.

“Scopely” mobil və onlayn oyun bazarında fəaliyyət göstərir və müxtəlif tanınmış oyun layihələrinin istehsalı və idarə olunması ilə məşğuldur.

“Moonton” – təxminən 4 milyard dollar

“TikTok”un sahibi kimi tanınan “ByteDance” 2021-ci ildə “Moonton”u təxminən 4 milyard dollarlıq sövdələşmə ilə əldə edib.

Çinin oyun şirkəti xüsusilə “Mobile Legends: Bang Bang” oyunu ilə məşhurdur.

“Bungie” – 3,6 milyard dollar

“Sony Interactive Entertainment” 2022-ci ildə “Bungie”ni 3,6 milyard dollarlıq sövdələşmə ilə satın alıb.

“Bungie” xüsusilə “Destiny” seriyasının yaradıcısı kimi tanınır. Studiya daha əvvəl “Halo” seriyasının yaradılmasında da mühüm rol oynayıb.

“Mojang” – 2,5 milyard dollar

“Microsoft”un ən diqqətçəkən oyun satınalmalarından biri də “Minecraft”ın yaradıcısı “Mojang” olub.

Şirkət İsveç oyun studiyasını 2014-cü ildə 2,5 milyard dollara satın alıb.

Bu addımla dünyanın ən məşhur videooyunlarından biri olan “Minecraft” “Microsoft”un portfelinə keçib.

“Glu Mobile” – 2,1 milyard dollar

“Electronic Arts” mobil oyun bazarındakı fəaliyyətini genişləndirmək məqsədilə “Glu Mobile”ı satın alıb.

2021-ci ildə tamamlanan sövdələşmənin dəyəri təxminən 2,1 milyard dollar təşkil edib.

“Glu Mobile” mobil cihazlar üçün hazırladığı müxtəlif oyunlarla tanınırdı və satınalma “Electronic Arts”ın mobil oyun portfelinin genişlənməsinə imkan verib.