“Azadlıqdan məhrum etmə” rejimi Aeroflot, Utair və Azur Air-in ABŞ ixrac nəzarəti qaydalarına tabe olan məhsullarla bağlı ixrac və reeksport əməliyyatlarına qoyulan məhdudiyyətləri əhatə edir

ABŞ Rusiyanın aparıcı aviaşirkətlərinə qarşı tətbiq etdiyi ixrac məhdudiyyətlərini daha bir müddət uzadıb.

Bestmedia.az xəbər verir ki, məhdudiyyətlərin uzadılması ilə bağlı müraciəti ABŞ Ticarət Nazirliyinin tabeliyində fəaliyyət göstərən Sənaye və Təhlükəsizlik Bürosu (BIS) təqdim edib. Sözügedən məhdudiyyətlər ilk dəfə 7 aprel 2022-ci ildə tətbiq olunub və həmin vaxtdan etibarən dəfələrlə uzadılıb.

Məhdudiyyətlər Aeroflot, Utair və Azur Air aviaşirkətlərinə şamil olunur. Qərara əsasən, bu şirkətlər ABŞ-ın ixrac nəzarəti qaydalarına tabe olan məhsulların ixracı və xaricdən reeksportu ilə bağlı əməliyyatlarda iştirak edə bilməzlər.

Məhdudiyyətlər çərçivəsində aviaşirkətlərin ABŞ-dan ehtiyat hissələri əldə etməsi, eləcə də ölkədə təyyarələrə texniki xidmət və təmir göstərilməsi imkanları da məhdudlaşdırılıb. Həmçinin ABŞ mənşəli komponentlərin üçüncü ölkələr üzərindən Rusiyaya reeksportu qadağan edilir.

ABŞ Ticarət Nazirliyinin Sənaye və Təhlükəsizlik Bürosu 2022-ci ilin aprelində Aeroflot, Azur Air və Utair-in ixrac imtiyazlarının dayandırılması barədə qərarlar qəbul etmişdi. BIS bu addımı ixrac qaydalarının pozulması ilə əlaqələndirmişdi.

ABŞ-ın Rusiyanın aviasiya sektoruna qarşı tətbiq etdiyi bu məhdudiyyətlər 2022-ci ilin martından etibarən Rusiyanın aviasiya sənayesi ilə əlaqəli bir sıra müəssisələrə qarşı genişləndirilən ixrac nəzarəti tədbirlərinin bir hissəsidir.