Səudiyyə Ərəbistanı Mədinə və Ər-Riyad yaxınlığındakı Şərq-Qərb neft boru kəmərinə edilən hücumları qətiyyətlə pisləyir.

Musavat.com xəbər verir ki, bu, Krallığın Xarici İşlər Nazirliyinin Səudiyyə Mətbuat Agentliyinin (SPA) yaydığı açıqlamasında əksini tapıb: "Şərq-Qərb boru kəmərinə İraqdan buraxılan bir neçə dron hücum edib və nəticədə itkilər olub".

Bəyanatda qeyd edilir ki, Səudiyyə rəhbərliyi İraq Baş naziri Əli əl-Zeydinin ölkəni sabitləşdirmək səylərini dəstəkləmək üçün onun xahişi ilə silahlı hücuma cavab verməmək qərarına gəlib: "Eyni zamanda Krallıq suverenliyini, milli təhlükəsizliyini və iqtisadi aktivlərini qorumaq üçün bütün tədbirləri görmək hüququnu özündə saxlayır".

Daha əvvəl Səudiyyə Ərəbistanı Energetika Nazirliyi dron hücumlarından sonra Mədinə və Ər-Riyad yaxınlığındakı hissələrdə Şərq-Qərb neft boru kəmərinin qabaqlayıcı şəkildə bağlandığını elan edib. Dronların İran tərəfindən dəstəklənən İraq şiə qrupları tərəfindən buraxıldığı güman edilir.