Moskva knyazı Dmitri Donskoyun 637 il əvvəl stenokardiya nəticəsində yaranan infarktdan dünyasını dəyişdiyi ehtimal olunur.

Bu barədə Moskva Kremlinin Muzeylərinin elmi işlər üzrə baş direktor müavini Andrey Batalov TASS agentliyinə müsahibəsində deyib.

Tarixi mənbələrdə hökmdarın 38 yaşında vəfat etməsinin dəqiq səbəbi göstərilməsə də, onun dəfn yerinin tədqiqi sayəsində yeni detallar aşkar edilib. Ağ daşdan hazırlanmış sarkofaqın daxili formasının genişləndirilməsi xüsusiyyətləri knyazın həyatının sonlarında olduqca iri və cüssəli bir şəxs olduğunu deməyə əsas verir. Cüssəli bədən quruluşu və sərkərdənin üzləşdiyi nəhəng fiziki-psixoloji təzyiqlər yüksək ehtimalla ürək-damar xəstəliklərinin yaranmasını tətikləyib.

"Böyük ehtimalla, o, stenokardiyadan əziyyət çəkib və ömrü infarktla yekunlaşıb. Knyazın məruz qaldığı ağır sınaqlar fonunda bu, gözlənilən haldır", - deyə Batalov qeyd edib.

Qeyd edək ki, Moskva Kremlində yerləşən Arxangelsk kafedralında müqəddəs knyaz Dmitri Donskoyun nəşinin qalıqları aşkar edilib. İyul ayından bəri orada döşəmə plitələrinin çökməsi təhlükəsi ilə əlaqədar bərpa işləri həyata keçirilirdi, çünki həmin plitələr böyük knyazların məzarlarının üzərinə düşə bilərdi.