Orqan çatışmazlığı yaşayan xəstələr üçün alternativ transplantasiya imkanı yaranır.

Modern.az xəbər verir ki, “The Lancet” jurnalında dərc olunan yeni araşdırmaya əsasən, 66 yaşlı, 2-ci tip şəkərli diabet fonunda böyrək çatışmazlığından əziyyət çəkən xəstəyə genetik modifikasiya olunmuş donuz böyrəyi köçürülüb. İnsan donorundan böyrək gözləmə müddətinin beş ildən çox olacağı proqnozlaşdırılan xəstə bundan əvvəl iki il ərzində hemodializ müalicəsi alıb.

2025-ci ilin yanvarında ona 69 genom modifikasiyası edilmiş donuz böyrəyi transplantasiya olunub. Tədqiqatçıların məlumatına görə, böyrək əməliyyatdan dərhal sonra fəaliyyət göstərməyə başlayıb və xəstəni 271 gün ərzində dializdən azad edib.

Doqquz aydan sonra donuz böyrəyinin funksiyası zəifləyib və orqan çıxarılıb. Daha sonra xəstəyə vəfat etmiş insandan götürülmüş böyrək uğurla transplantasiya edilib. Müəlliflərin bildirdiyinə görə, xəstədə insan donor orqanının qəbuluna mane olacaq anticisimlər və heyvandan insana keçən infeksiya aşkarlanmayıb.

66 yaşlı Tim Endryus üçün bu müddət ərzində donuz böyrəyi sadəcə tibbi eksperiment deyil, insan donorundan orqan gözlədiyi dövrdə gündəlik həyata qayıtmaq imkanı yaradıb. O, yenidən yemək bişirə, evdə təmizlik edə və iti ilə gəzintiyə çıxa bilib.

Azərbaycanda da orqan transplantasiyasına ehtiyacı olan xəstələr üçün donor orqanlarının çatışmazlığı mühüm məsələlərdən biridir. Bu baxımdan genetik modifikasiya edilmiş heyvan orqanlarının insanlara transplantasiyası gələcəkdə donor gözləmə siyahılarının yükünü azaltmaq üçün potensial alternativ kimi nəzərdən keçirilə bilər.