ABŞ-ın ən varlı milyarderləri arasında ölkənin ən böyük idman klublarına sahib şəxslər də yer alır. Forbes-in 2026-cı il araşdırmasına görə, ölkənin ən varlı 20 idman klubu sahibinin ümumi sərvəti 666 milyard dollara çatıb. Bu şəxslər ümumilikdə 37 böyük idman klubunda nəzarət payına sahibdirlər.

1. Steve Ballmer — 156 milyard dollar

Steve Ballmer texnologiya sektorunda tanınan milyarderdir. O, 2000–2014-cü illərdə Microsoft-un baş direktoru olub. Ballmer 2014-cü ildə Los Angeles Clippers basketbol klubunu 2 milyard dollara alıb. Hazırda Forbes onu ABŞ-ın ən varlı idman klubu sahibi hesab edir.

2. Rob Walton — 132 milyard dollar

Rob Walton Walmart-ın qurucusu Sam Waltonun böyük oğludur və sərvətinin əsas hissəsi pərakəndə satış biznesi ilə bağlıdır. O, 2022-ci ildə investorlar qrupuna rəhbərlik edərək Denver Broncos futbol klubunu 4,7 milyard dollara satın alıb.

3. Henry Samueli — 33,8 milyard dollar

Henry Samueli mühəndis və texnologiya sahibkarıdır. O, Broadcom-un həmtəsisçisi kimi böyük sərvət qazanıb. Samueli Anaheim Ducks xokkey klubunun sahibidir.

4. Miriam Adelson — 33,5 milyard dollar

Miriam Adelson sərvətinin əsas hissəsini kazino və əyləncə biznesindən əldə edib. O, mərhum həyat yoldaşı Sheldon Adelsonun qurduğu Las Vegas Sands imperiyasındakı payı ilə milyarderlər sırasında yer alır. Adelson ailəsi Dallas Mavericks basketbol klubunun əsas sahibləri arasındadır.

5. Robert Pera — 29,6 milyard dollar

Robert Pera texnologiya sahibkarıdır və Ubiquiti şirkətinin qurucusu və baş direktorudur. O, 2012-ci ildə Memphis Grizzlies basketbol klubunu satın alıb.

6. David Tepper — 28,5 milyard dollar

David Tepper əsas sərvətini investisiya və maliyyə sektorunda qazanıb. O, Appaloosa Management hedc-fondunun qurucusudur. Tepper Carolina Panthers NFL klubunun sahibidir.

7. Stan Kroenke — 27,6 milyard dollar

Stan Kroenke daşınmaz əmlak biznesində fəaliyyət göstərən milyarderdir. Onun idman imperiyasına NFL-in Los Angeles Rams, NBA-nın Denver Nuggets, NHL-in Colorado Avalanche, MLS-in Colorado Rapids və İngiltərə Premyer Liqasının Arsenal klubu daxildir.

8. Steve Cohen — 26,7 milyard dollar

Steve Cohen əsas sərvətini maliyyə bazarlarında, xüsusilə hedc-fond biznesində qazanıb. O, Point72 investisiya şirkətinin təsisçisidir. Cohen MLB-də çıxış edən New York Mets klubunun sahibidir.

9. Jerry Jones — 23,5 milyard dollar

Jerry Jones neft və enerji sektorunda fəaliyyət göstərən biznesmen kimi böyük sərvət qazanıb. O, 1989-cu ildən Dallas Cowboys klubunun sahibidir. Forbes-in son qiymətləndirməsinə görə, Cowboys 17 milyard dollar dəyərində olmaqla NFL-in ən qiymətli komandasıdır. Klub bu mövqeyini ardıcıl 20-ci il qoruyub

10. Dan Gilbert — 22,9 milyard dollar

Dan Gilbert amerikalı sahibkar və investor, həmçinin Rocket Companies şirkətinin təsisçisidir. O, NBA-nın Cleveland Cavaliers klubunun sahibidir.

Forbes-in hesablamasına görə, bu 20 milyarderin sərvəti ötən illə müqayisədə 10% artaraq 607 milyard dollardan 666 milyard dollara yüksəlib. İlk 20-liyə düşmək üçün tələb olunan minimum sərvət isə 12,2 milyard dollar olub.