Dünən Londondakı O2 Arenada boks üzrə peşəkarlar arasında ağır çəkidə ilin ən maraqlı döyüşlərindən biri keçirildi. 21 yaşlı, perspektivli, müasir “Mayk Tayson” adlandırılan Mozes İtauma vakant IBF dünya çempionu adı uğrunda təcrübəli xorvatiyalı Filip Hrqoviçlə qarşılaşdı.
Döyüşün ilk hissəsi İtaumanın üstünlüyü ilə keçdi. Onun sürəti və kombinasiyaları Hrqoviçə ciddi problemlər yaratdı. İkinci raundda İtauma rəqibini nokdauna da saldı. Elə təəssürat yaranırdı ki, gənc britaniyalı asan qələbə çalacaq.
Amma ağır çəkidə sürət hər şey demək deyil. Hrqoviç ən böyük üstünlüyünü — dözümlülüyünü, möhkəm çənəsini və böyük döyüş təcrübəsini ortaya qoydu. İtauma Hrqoviçi nokauta salmağa çalışarkən həddindən artıq enerji sərf etdi və son raundlara doğru fiziki cəhətdən kəskin zəiflədi.
Doqquzuncu raundda vəziyyət tamamilə dəyişdi. Artıq taqətdən düşmüş İtauma Hrqoviçin hücumlarına cavab verə bilmirdi və İtaumanın sekundantı rinqə dəsmal ataraq döyüşü dayandırmalı oldu. Filip Hrqoviç texniki nokautla qalib gələrək IBF titulunu qazandı və Xorvatiya tarixində ağır çəkidə ilk dünya çempionu oldu.
Məncə, bu döyüş boksun çox köhnə bir həqiqətini bir daha göstərdi: istedad və sürət böyük üstünlükdür, amma yüksək səviyyədə təcrübə, dözümlülük, zərbəyə davamlılıq və qüvvəni raundlar arasında düzgün bölüşdürmək bəzən daha həlledici olur.
İtauma üçün isə bu məğlubiyyət faciə deyil. Cəmi 21 yaşı var və belə ağır sınaq onun gələcək karyerası üçün çox qiymətli dərs ola bilər. Hrqoviç isə sonadək döyüşərək əsl çempion xarakteri nümayiş etdirdi.
Möhtəşəm və sonadək proqnozlaşdırılması mümkün olmayan ağır çəki döyüşü!
Fuad Arif Oğlu Ağayev