Əfsanəvi keçmiş hakim, hazırda FIFA-nın Hakimlər Komitəsinin rəhbəri vəzifəsində çalışan Pierluigi Collina Argentina 3:2 Misir oyunundan sonra hakimliklə bağlı səslənən sərt tənqidlərə cavab olaraq:
“FIFA hakimliyinin hər hansı bir şəxs tərəfindən təsirləndiyini iddia etmək mümkün deyil. Hakimlər qərarlarını vicdanla qəbul edirlər və futbolçular, məşqçilər kimi onlar da hər zaman əllərindən gələnin ən yaxşısını etməyə çalışırlar.
Əlbəttə, hakim qərarları ilə bağlı konstruktiv müzakirələr futbolun ayrılmaz hissəsidir. Amma əsassız ittihamların idmanda yeri yoxdur.
Heç kim hakimlərin dürüstlüyünü şübhə altına almamalıdır. Belə ittihamlar hakimlərin və onların ailələrinin təhdid olunmasına qədər gedib çıxa bilər.
Heç kim FIFA Hakimlər Departamentinin, o cümlədən FIFA prezidenti Gianni Infantinonun təsiri altında işlədiyini iddia edə bilməz. O, hər zaman bizə tam dəstək verib və fəaliyyətimizi tam müstəqil şəkildə həyata keçirməyimizə etibar edib.
Hər qoldan sonra VAR texnologiyası hücum fazasını (APP) yoxlayır. Əgər əvvəlki epizodda qolun yaranmasına təsir edən qayda pozuntusu aşkarlanarsa, VAR meydanda baxış keçirilməsini tövsiyə edir. Qolun vurulması ilə qayda pozuntusu arasında məsafə və ya vaxt baxımından müəyyən edilmiş heç bir məhdudiyyət yoxdur.
Bunun nümunəsini Argentina – Misir oyununda gördük. Misirin 19 nömrəli futbolçusu Marwan Attia açıq şəkildə Argentinanın 6 nömrəli futbolçusu Lisandro Martínezin ayağına basmışdı. Bizim üçün qayda pozuntusu – qayda pozuntusudur. Onun açıq və ya gizli olması fərq etmir. Hakim bunu meydanda görməyibsə, VAR müdaxilə edə bilər.
Argentina millisinin qolundan əvvəl Mohamed Salah ilə Julian Alvarez arasında baş verən epizoda gəlincə, orada qayda pozuntusu yox idi. Əgər olsaydı, VAR hakimi bunu bildirərdi.
Rəqibin ayağına basmaq qayda pozuntusudur. Lakin müdafiəçi əvvəlcə topa toxunur, sonra futbol çərçivəsində normal təmas yaranırsa, bu qayda pozuntusu sayılmır. Epizod futbol daxilində normal təmas kimi qiymətləndirildi”.
Mundo Deportivo