Azərbaycan Prezidenti İlham Əliyevin sentyabrın 17-də Bakıda keçirilən Türk Dövlətləri Təşkilatının (TDT) Təhlükəsizlik Şuraları katiblərinin 5-ci iclasının iştirakçıları ilə görüşündəki proqram xarakterli çıxışı Türk dünyasının vahid təhlükəsizlik arxitekturasının formalaşdırılması istiqamətində mühüm tarixi addımdır. Bakıda keçirilən bu görüş təşkilat daxilində strateji tərəfdaşlığın institusional səviyyəyə yüksəldiyini aydın nümayiş etdirir.
Prezident İlham Əliyev öz çıxışında TDT-nin qlobal arenada çəkisinin sürətlə artdığını xüsusi qeyd etmişdir. Bir neçə gün əvvəl dini liderlərin, ardınca isə təhlükəsizlik rəhbərlərinin Bakıda toplaşması platformanın çoxtərəfli və fəal xarakterini göstərir. Türk dünyasının təxminən 180 milyona yaxın əhalisi, nəhəng coğrafi ərazisi və trilyonlarla dollarlıq məcmu ÜDM-i onun böyük bir güc mərkəzinə çevrildiyinin bariz sübutudur.
Dövlətimizin başçısı vurğulayıb ki, müasir geosiyasi şəraitdə və xüsusilə sərhədlərimizin perimetri boyunca enerji təhlükəsizliyi məsələləri mühüm əhəmiyyət kəsb edir. TDT ölkələrinin sahib olduğu zəngin təbii ehtiyatlar həm milli müstəqilliyin möhkəmlənməsinə, həm də qlobal bazarların sabitliyinə xidmət edir. Azərbaycan bu zəncirdə həm istehsalçı, həm də Mərkəzi Asiya resurslarının Xəzər vasitəsilə Qərbə çatdırılmasını təmin edən etibarlı tranzit qovşağıdır
Görüşün gündəliyində duran əsas məsələ hibrid təhdidlər, transmilli mütəşəkkil cinayətkarlıq, beynəlxalq terrorizm və kibercinayətkarlıqla birgə mübarizə olmuşdur. Azərbaycan lideri qeyd edib ki, müasir çağırışlar yalnız kəşfiyyat və təhlükəsizlik orqanlarının mütəmadi dialoqu, qarşılıqlı etimadı və operativ məlumat mübadiləsi sayəsində effektiv şəkildə neytrallaşdırıla bilər.
Prezident çıxışında gənc nəslin yad təsirlərdən, dini ekstremizmdən və ideoloji təxribatlardan qorunmasının önəmini xüsusi vurğulamışdır. Türk dövlətlərinin gücü onun köklü tarixi, dili, dini və ortaq mədəniyyətidir. Qlobal manipulyasiyaların qarşısını almaq üçün gənclərin milli ruhda tərbiyə olunması strateji təhlükəsizlik məsələsi kimi önə çəkilmişdir.
Bakı görüşü Türk dünyasının sadəcə iqtisadi və mədəni platforma deyil, həm də qlobal miqyasda regional sabitliyi diktə edən ciddi hərbi-siyasi və təhlükəsizlik alyansına çevrildiyini növbəti dəfə təsdiqlədi. “Birlikdə güclüyük” şüarı altında atılan bu addımlar üzv dövlətlərin suverenliyinin ən böyük təminatıdır.

Aysel Mənsimova - politoloq