"Dərinin sağlamlığının dəstəklənməsi üçün C, A, E, D və B qrupu vitaminləri vacib əhəmiyyət kəsb edir. Bu vitaminlərdən hər biri öz funksiyasını yerinə yetirir".

Oxu.Az-ın xəbərinə görə, bu barədə rusiyalı dermatoloq və kosmetoloq İrina Kotova RT nəşrinə müsahibəsində danışıb.

Mütəxəssisin sözlərinə görə, C vitamini kollagenin sintezində iştirak edir, damar divarını dəstəkləyir və piqmentasiyanı açmağa kömək edir. A vitamini hüceyrə bölünməsini tənzimləyir və sızanaqların profilaktikasında istifadə olunur, E vitamini isə antioksidant kimi təsir edir və dərinin nəmlənməsinə kömək edir.

İrina Kotova, həmçinin iltihab əleyhinə təsir göstərən və dərinin baryer funksiyasını dəstəkləyən B3 vitamini və ya niasinamidi də vurğulayıb. D vitamini eyni zamanda hüceyrə bölünməsində və dərinin immun funksiyasında iştirak edir.

Bəzi vitaminlərin çatışmazlığını dolayı əlamətlərə əsasən müəyyən etmək olar. Yağlılıq və səpgilərə meyil A vitamininin udulması ilə bağlı problemlər, quruluq və dartılma hissi isə E vitamini çatışmazlığı ilə bağlı ola bilər. Lakin eyni zamanda əlamətlər özlüyündə çatışmazlığı təsdiqləmir.

İrina Kotova analizlərin nəticələrinə əsasən, hərəkət etməyi tövsiyə edir. Əgər vitamin çatışmazlığı təsdiqlənərsə, bu çatışmazlığı müvafiq dozalarda preparatlar və ya komplekslərlə əvəzləmək olar.