Məşhur fələstinli fotoqraf Motaz Azaizah 7 oktyabr 2023-cü ildə Qəzzada İsrail girovlarını daşıyan Əl-Qəssam militant maşınını gördüyünü söylədi. Onun sözlərinə görə, yerli sakinlər maşını mühasirəyə alaraq əsirləri döyməyə başlayıblar, o isə hadisələri izləyib lentə alıb. Lakin fotoqraf görüntüləri dərc etməyib. Azaizah izah edib ki, İsrail hücum edənləri müəyyən edib onları məhv edə bilərdi.

Jurnalist Əhməd Bikəvi ilə Takarab podkastı üçün müsahibəsində fotoqraf HƏMAS-ı da sərt tənqid edib. O, qrupun silahlarının qəzzalıları qoruya bilmədiyini və qrupun əvvəlki razılaşmaları rədd etməsinin on minlərlə insanın ölümünə səbəb olduğunu bildirib. Azaizah həmçinin sakinlərin HƏMAS-dan narazılığını göstərən jurnalistlərin təqibindən də danışıb. Fotoqraf hazırda Qətərdə yaşayır və bu yaşadıqlarının ona ağır psixoloji travma verdiyini etiraf edir.
Şəkil: FeaturingDallas
Nüşabə Şəkərova