“Heart Aerospace” 36 sərnişin üçün nəzərdə tutulan ES-36 regional hibrid-elektrik sərnişin təyyarəsini təqdim edib. Şirkətin məlumatına görə, yeni təyyarə seriyalı istehsala buraxılacaq.

Valyuta.az xəbər verir ki, bu barədə ABŞ şirkəti öz saytında məlumat yayıb.

Təqdimatla eyni vaxtda aviaşirkət “JSX” depozit ödəməklə 50 ədəd ES-36 təyyarəsinin alınması barədə razılaşma imzaladığını açıqlayıb. Şirkətə daha 50 təyyarə almaq hüququ da verilib.

ES-36 daha əvvəl təqdim edilmiş ES-30 modelinin inkişaf etdirilmiş versiyasıdır. ES-36-nın qanad açıqlığı təxminən 29 metrdir ki, bu da ES-30-dan təxminən 3,4 metr azdır.

ES-30 ilə müqayisədə ES-36 daha 6 sərnişin yeri və 642 kiloqram artırılmış yükdaşıma qabiliyyəti əldə edib. Bununla belə, maksimal qalxış kütləsi və akkumulyator batareyasının tutumu əvvəlki versiyada olduğu kimi qalıb.

Yeni təyyarə iki mühərrik gondolundan və hibrid-elektrik güc qurğusundan ibarət sadələşdirilmiş konstruksiyaya malikdir. Bunun seriyalı modelin ənənəvi regional təyyarələrlə müqayisədə istismar xərcləri baxımından üstünlüyünü artıracağı gözlənilir.

Dörd mühərrik gondolundan ikisinə keçid güc qurğusunda texniki xidmət tələb edən komponentlərin sayını azaldır və bununla da xərclərin aşağı salınmasına imkan verir. İki hibrid güc qurğusunun hər biri pərvanəni hərəkətə gətirmək üçün 1,65 meqavat gücündə elektrik mühərrikindən istifadə edir.

Yerdə doldurulan bort akkumulyatorları təyyarəyə tam elektrik rejimində 200 kilometrədək uçuş məsafəsi təmin edir. Bu məsafəyə ehtiyat enerji də əlavə olunur. Beləliklə, operatorlar qısa məsafəli reysləri yanacaq sərf etmədən həyata keçirə biləcəklər.

Daha uzun uçuşlar üçün ES-36 1200 kilometr hibrid uçuş məsafəsinə malikdir. Buraya da ehtiyat məsafə daxildir. Bu göstərici iki güc qurğusunun hər birində meqavat sinfinə aid turbogeneratorun quraşdırılması hesabına əldə olunur.

Hər bir turbogenerator ayrıca kompakt qaz turbinindən enerji alır. Uçuş zamanı qaz turbinləri elektrik enerjisi istehsal edir. Bu enerji akkumulyatorların təmin etdiyi gücü tamamlayaraq elektrik mühərriklərinin işləməsini təmin edir.

Şirkətin fikrincə, bu texnologiya operatorlara regional təyyarənin geniş uçuş imkanlarını və çevikliyini təmin edə bilər. “Heart” köhnə regional təyyarələrlə müqayisədə istismar xərclərinin ən azı 40 faiz aşağı olacağını vəd edir.

Hazırda şirkət ilk istehsaldan əvvəlki ES-36 təyyarəsini Los-Ancelesdəki istehsal müəssisəsində hazırlayır. Təyyarənin ilk uçuşunun 2028-ci ilin ikinci yarısında, istismara verilməsinin isə 2031-ci ildə həyata keçirilməsi planlaşdırılır.